জন্মদিনৰ পাৰ্টি চলি থাকোতে ভাঙি পৰিল ৰেষ্টোৰাঁ : ২৯ গৰাকী লোক নিহত আৰু আহত ৩০

জন্মদিনৰ পাৰ্টি চলি থকা অৱস্থাত এখন ৰেষ্টোৰেণ্ট ভাঙি অতি কমেও ২৯ জন লোকৰ মৃত্যু ঘটিছে।

এই কৰুণ দুৰ্ঘটনাটো ঘটিছে চীনৰ চানজি প্ৰদেশৰ জিয়াংফেন অঞ্চলত।

স্থানীয় সূত্ৰৰ খবৰ মতে শনিবাৰে জিয়াংফেন অঞ্চলৰ জুজিয়াং নামৰ এখন ৰেষ্টোৰেণ্টত এজন লোকৰ জন্মদিনৰ পাৰ্টি আয়োজন কৰা হৈছিল। উক্ত পাৰ্টিত প্ৰায় ৭০০ জন লোক উপস্থিত আছিল।

উক্ত জন্মদিনৰ পাৰ্টিত অভ্যাগতসকলে আনন্দ উপভোগ কৰি থকাৰ সময়তে হঠাতে ৰেষ্টোৰেণ্টৰ দুই মহলীয়া বিল্ডিঙটো খহি পৰে।

বিল্ডিঙটো খহি পৰাৰ ফলত তাত উপস্থিত থকা সকলো লোক ধ্বংসস্তূপত আৱদ্ধ হৈ পৰে। আৰু ইয়াৰে ৯০ জন লোক ধ্বংসস্তূপৰ তলত সোমাই পৰে।

দুভাৰ্গ্যজনক ঘটনাটোৰ খবৰ পোৱাৰ লগে লগে উদ্ধাৰকাৰী দল উপস্থিত হৈ উদ্ধাৰ কাৰ্য আৰম্ভ কৰে।

দেওবাৰে দুপৰীয়ালৈকে উদ্ধাৰকাৰী দলে বিল্ডিঙটোৰ ধ্বংসস্তূপৰ তলত সোমাই পৰা ৯০ জন লোকৰ মাজৰ ২৯ জন লোকক মৃত অৱস্থাত আৰু অন্য ৬০ গৰাকীক আহত অৱস্থাত উদ্ধাৰ কৰিছে।

আহতসকলক ততালিকে চিকিৎসাৰ বাবে চিকিৎসালয়ত ভৰ্তি কৰোৱা হৈছে আৰু ইয়াৰে অধিক সংখ্যকৰে অৱস্থা অতি সংকটজনক বুলি জানিব পৰা গৈছে।

স্থানীয় প্ৰশাসনে সংবাদ মাধ্যমৰ আগত প্ৰকাশ কৰিছে যে জন্মদিনৰ পাৰ্টি চলি থকা অৱস্থাত হঠাতে এই মৰ্মান্তিক দুৰ্ঘটনাটো সংঘটিত হৈছে আৰু এতিয়াও দুৰ্ঘটনাৰ কাৰণ জানিব পৰা হোৱা নাই।

তদন্তকাৰী দলে ইতিমধ্যে ঘটনাস্থলীত উপস্থিত হৈ ৰেষ্টোৰাঁখনৰ কৰ্তৃপক্ষকক জেৰা কৰি দুৰ্ঘটনাটোৰ তদন্ত আৰম্ভ কৰিছে।