ৰাজ্য প্রশাসনৰ কেইবাগৰাকীও প্ৰশাসনিক বিষয়াৰ পদোন্নতি তথা সালসলনি

ৰাজ্য চৰকাৰৰ কেইবাগৰাকীও এচিএছ বিষয়াক বৃহস্পতিবাৰে জাৰি কৰা এক নিৰ্দেশনাৰ জৰিয়তে পদোন্নতি তথা ৰদবদল কৰা হৈছে।

এই সন্দৰ্ভত জাৰি কৰা নিৰ্দেশনা অনুসৰি পেঞ্চন বিভাগৰ অতিৰিক্ত সচিব দেবজিৎ বৰাক সচিব পদলৈ পদোন্নতি দিয়া হৈছে।

স্বাস্থ্য আৰু পৰিয়াল কল্যাণ বিভাগৰ অতিৰিক্ত সচিব মনিকা দাস মেধিক সচিব হিচাপে পদোন্নতি দিয়া হৈছে। সেইদৰে গৃহ আৰু ৰাজনৈতিক বিভাগৰ অতিৰিক্ত সচিব হিচাপে কাৰ্যনিৰ্বাহ কৰি থকা বাবুলাল শৰ্মাক বিভাগটোৰ সচিব পদলৈ পদোন্নতি দিয়া হৈছে।

নিৰ্দেশনাযোগে কৃষি বিভাগৰ অতিৰিক্ত সচিব ৰূপজ্যোতি চহৰীয়াক কৃষিৰ লগতে আবকাৰী বিভাগৰো সচিব পদত নিযুক্তি দিয়া হৈছে। তদুপৰি, অতিৰিক্ত সচিব পদৰ পৰা শক্তি বিভাগৰ সচিব পদলৈ পদোন্নতি দিয়া হৈছে কল্যাণী দাস তালুকদাৰক।

ৰাজীৱ শ্বাহ, উদিত হুছেইনক পৰিবহণ আৰু পৰ্যটন বিভাগৰ অতিৰিক্ত সচিব পদৰ পৰা সচিব পদলৈ পদোন্নতি দিয়া হৈছে। অতিৰিক্ত সচিব পদৰ পৰা সচিব পদলৈ পদোন্নতি দিয়া হৈছে আন এগৰাকী এচিএছ বিষয়া মণিৰত্ন মহন্তক। সেইদৰে ছৈয়দা হাছিনা মুৰ্ছিদক অতিৰিক্ত সচিব পদৰ পৰা সচিব পদলৈ বদলি কৰা হৈছে।

একেটা নিৰ্দেশনা যোগে ওদালগুৰিৰ উপাযুক্ত দিলীপ কুমাৰ দাসক ৰাজহ বিভাগৰ সচিব পদলৈ পদোন্নতিসহ বদলি কৰা হৈছে। অসম বিত্তীয় বিভাগৰ বন্দনা দত্ত তামুলীক সচিব হিচাপে পদোন্নতি দি ৰাজ্য চৰকাৰৰ সাধাৰণ প্ৰশাসন আৰু সচিবালয় প্ৰশাসনলৈ বদলি কৰা হৈছে।

আনহাতে, মীন বিভাগৰ পৰা জে ডেকা ঠাকুৰক পাব্লিক এণ্টাৰপ্ৰাইজ বিভাগলৈ সচিব পদলৈ পদোন্নতি দি বদলি কৰা হৈছে।