ৰীমা দাসৰ ‘বুলবুল কেন ছিং’ ছবিৰে আৰম্ভ হ’ব ‘ইণ্ডিয়ান ফিল্ম ফেষ্টিভেল অব মেলবৰ্ণ’

অসমৰ চলচ্চিত্ৰক্ষেত্ৰলৈ আন এক সুখবৰ। ‘ভিলেজ ৰকষ্টাৰ্ছ’ ছবিৰে দেশে-বিদেশে বহু সন্মান অৰ্জনেৰে অসমলৈ গৌৰৱ কঢ়িয়াই অনা ৰীমা দাসৰ শেহতীয়া ছবি ‘বুলবুল কেন ছিং’লৈ এইবাৰ আহিছে এক বিশেষ কৃতিত্ব।

‘ইণ্ডিয়ান ফিল্ম ফেষ্টিভেল অব মেলবৰ্ণ’ত প্ৰদৰ্শিত হ’ব বুলবুল কেন ছিং। বিশ্বৰ অন্যতম সন্মানীয় ছবি মহোৎসৱখনৰ প্ৰথম নিশাই ৰীমা দাসৰ ছবিখন প্ৰদৰ্শিত কৰা হ’ব। উদ্যোক্তাই টুইটাৰৰ জৰিয়তে এই কথা জনাইছে।

মহোৎসৱখনক লৈ ব্যাপক উৎসাহী পৰিচালক ৰীমা দাসে কয় যে সন্মানীয় ‘ইণ্ডিয়ান ফিল্ম ফেষ্টিভেল অব মেলবৰ্ণ’ত ছবিখন প্ৰদৰ্শনৰ বাবে নিৰ্বাচিত কৰাত যথেষ্ট আনন্দিত হৈছো। ইয়াৰ বাবে পৰিচালক ৰীমা দাসে আয়োজকক ধন্যবাদ জ্ঞাপন কৰিছে।

তেওঁ লগতে কয় যে ছবি নিৰ্মাতা হিচাপে এই ছবিখন মোৰ বাবে বিশেষ। বিশ্বৰ বিভিন্ন প্ৰান্তত এই ছবিখন প্ৰদৰ্শিত হোৱাৰ পাছত সকলোৱে শলাগ লোৱা বুলিও পৰিচালক ৰীমা দাসে কয়।

অহা ৮ আগষ্টৰ পৰা ১৮ আগষ্টলৈ চলিব লগীয়া দশম সংখ্যক ‘ইণ্ডিয়ান ফিল্ম ফেষ্টিভেল অব মেলবৰ্ণ’ৰ প্ৰথম নিশা মুখ্য অতিথি হিচাপে উপস্থিত থাকিব বলিউদৰ ছুপাৰষ্টাৰ অভিনেতা শ্বাহৰুখ খান।