কংগ্ৰেছ নেত্ৰী মীৰা বৰঠাকুৰৰ বিৰুদ্ধে মানহানিৰ গোচৰ ৰুজু মুখ্যমন্ত্ৰীৰ পত্নী ৰিনিকি ভূঞা শৰ্মাৰ

অসমৰ মুখ্যমন্ত্ৰী হিমন্ত বিশ্ব শৰ্মাৰ পত্নী ৰিনিকি ভূঞা শৰ্মাই অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰ গোস্বামীৰ বিৰুদ্ধে অপৰাধমূলক মানহানিৰ গোচৰ ৰুজু কৰিছে।

ইণ্ডিয়া টুডেৰ বাতৰি অনুসৰি, কংগ্ৰেছ নেত্ৰীগৰাকীয়ে মুখ্যমন্ত্ৰীৰ পত্নীৰ বিৰুদ্ধে ধৰ্মীয় স্থানৰ নামত পুঁজি সংগ্ৰহৰ অভিযোগ উত্থাপন কৰিছিল।

ৰিনিকী ভূঞা শৰ্মাই নগাঁৱৰ মহামৃত্যুঞ্জয় ধাম আৰু গুৱাহাটীৰ মা কামাখ্যা মন্দিৰত ভক্তৰ পৰা অনুদান সংগ্ৰহ কৰাৰ অভিযোগ উত্থাপন কৰিছিল মীৰা বৰঠাকুৰে।

প্ৰাইড ইষ্ট এণ্টাৰটেইনমেণ্টছৰ অধ্যক্ষ তথা পৰিচালন সঞ্চালক ৰিনিকি ভূঞা শৰ্মাই এই দাবীক মিছা, ভিত্তিহীন আৰু মানহানিকাৰক বুলি অভিহিত কৰে। তেওঁ এই সন্দৰ্ভত আইনী ব্য়ৱস্থা গ্ৰহণৰ কথা সদৰী কৰে।

শৰ্মাই কয় যে, “মই তেওঁৰ বিৰুদ্ধে গোচৰ তৰিছো আৰু তেওঁ নিজৰ দাবী প্ৰমাণ কৰিবলৈ ১৮ জুলাইত আদালতত হাজিৰ হ’ব লাগিব। ন্যায়ৰ বাবে মই শেষ পৰ্যন্ত যুঁজিম।”

বৰঠাকুৰে এনে গুৰুতৰ অভিযোগ উত্থাপন কৰি অহাটো এইটোৱেই প্ৰথম নহয়। যোৱা মে’ মাহত ৰাজ্যখনৰ মন্ত্ৰী জয়ন্ত মল্লবৰুৱাৰ বিৰুদ্ধে বোন্দাজান জলাশয় বেদখল কৰি ৩ কোটি টকা ৰাজহুৱা ধন ব্যৱহাৰ কৰি প্ৰয়াত পিতৃৰ স্মৃতিত ২৫৪ মিটাৰ পথ নিৰ্মাণৰ অভিযোগ উত্থাপন কৰিছিল।

ক্ষমতা আৰু ৰাজহুৱা সম্পদৰ অপব্যৱহাৰক লৈ কংগ্ৰেছে বিজেপি চৰকাৰক প্ৰত্যাহ্বান জনাই অহাৰ সময়তে এই মানহানিৰ গোচৰে ৰাজ্যৰ ৰাজনীতিৰ বতাহ উত্তপ্ত কৰি তুলিছে।