ৰাজস্থান ৰয়েলছৰ নতুন অধিনায়ক হ’ব ৰিয়ান পৰাগ! মেনেজমেন্টে দিছে সেউজ সংকেত
আগন্তুক আই পি এলত ৰাজস্থান ৰয়েলছৰ অধিনায়ক হ’ব ৰিয়ান পৰাগ। এই কথা বিভিন্ন সংবাদ মাধ্যমৰ সূত্ৰই দাবী কৰিছে। অৱশ্যে আনুষ্ঠানিক ঘোষণা এতিয়াও কৰা হোৱা নাই। বিভিন্ন প্ৰতিবেদনত দাবী কৰা হৈছে যে ইতিমধ্যে মেনেজমেন্টে সেউজ সংকেত দিছে।
আই পি এলৰ নিলামৰ পূৰ্বে চেন্নাই ছুপাৰ কিংছত যোগদান কৰা সঞ্জু চেমছনে নেতৃত্বৰ পদ খালী হৈ পৰে। সেই ঠাইত ফ্ৰেঞ্চাইজিয়ে যুৱ অলৰাউণ্ডাৰ পৰাগৰ ওপৰত আস্থা ৰাখিছে।
প্ৰতিবেদন অনুসৰি, ৰিয়ান পৰাগক অধিনায়ক হিচাপে নিযুক্তি দিয়াৰ ক্ষেত্ৰত মুখ্য প্ৰশিক্ষক কুমাৰ ছাংগাকাৰাই জোৰ দিছে। নেতৃত্বৰ বাবে যশস্বী জয়ছোৱাল আৰু ৰবীন্দ্ৰ জাদেজাৰ নামো চৰ্চা হৈছিল। প্ৰসংগক্ৰমে জয়ছোৱালেও কেইমাহমান পূৰ্বে ৰাজহুৱাভাৱে অধিনায়কত্বৰ প্ৰতি আগ্ৰহ প্ৰকাশ কৰিছিল। অৱশ্যে দলটোৱে অৱশেষত ৰিয়ানক বাছনি কৰাৰ দিশত আগবাঢ়িছে।
অৱশ্যেই এইটো প্ৰথমবাৰৰ বাবে নহয়। ইয়াৰ পূৰ্বে সঞ্জু আঘাতৰ বাবে বাহিৰ হোৱাৰ সময়ত পৰাগে ৰাজস্থানক আঠখন মেচত নেতৃত্ব দিছিল। সেই সময়ত তেওঁৰ বেটিং গড় আছিল ৩৮.৫৭। ইডেন গাৰ্ডেনত কলকাতা নাইট ৰাইডাৰ্ছৰ বিৰুদ্ধে ৯৫ ৰানৰ ইনিংছো খেলিছিল। অৱশ্যে পৰাগে দলটোক ৮খন মেচত মাত্ৰ দুখনতহে জয়ী কৰিছিল।
ইপিনে, এইবাৰ ৰাজস্থান ৰয়েলছৰ সৈতে ১১ বছৰীয়া দীৰ্ঘদিনীয়া সম্পৰ্কৰ অন্ত পেলাইছে সঞ্জু ছেমছনে। তেওঁৰ নেতৃত্বত ২০২২ চনতো দলটোৱে ফাইনেলত প্ৰৱেশ কৰিছিল।
সঞ্জুৱে দল এৰি যোৱাৰ পিছত যি ডাঙৰ খেলুৱৈৰ পৰিৱৰ্তন ঘটিছে তাৰ ভিতৰত ৰাজস্থান ৰয়েৱছলৈ আহিছে ৰবীন্দ্ৰ জাডেজা আৰু ছেম কৰণ। অভিজ্ঞতাৰ ফালৰ পৰা অধিনায়ক হিচাপে জাদেজাৰ নাম আছিল আটাইতকৈ শক্তিশালী। আনকি জোছ বাটলাৰৰ কথাও চৰ্চা হৈছিল।
কিন্তু যিহেতু ৰাজস্থান ৰয়েলছ এটা যুৱ ‘কোৰ গ্ৰুপ’ গঢ়ি তোলাৰ পথত আগবাঢ়িছে, সেয়েহে তেওঁলোকে দীৰ্ঘম্যাদী পৰিকল্পনাত ৰিয়ান পৰাগক আগস্থান দি নতুন অধ্যায় আৰম্ভ কৰিবলৈ আগ্ৰহী। এতিয়া কেবল আনুষ্ঠানিক ঘোষণাৰ বাবে অপেক্ষা। একাধিক প্ৰতিবেদনত এই কথাই দাবী কৰা হৈছে।