মিনি বিশ্বকাপ চেম্পিয়নছ ট্ৰফী জয়ৰ সুবাদতে ইংলেণ্ডৰ বিৰুদ্ধে টেষ্ট শৃংখলাতো অধিনায়ক ৰোহিত

মাত্ৰ দুমাহ পূৰ্বে অষ্ট্ৰেলিয়া ভ্ৰমণৰ পঞ্চমখন খেলৰ সময়ত ভাৰতীয় ক্ৰিকেট দলৰ প্ৰথম একাদশৰ পৰা আঁতৰি আহিছিল। ধাৰাবাহিকভাৱে ফৰ্মৰ বাহিৰত থকাৰ বাবে তেওঁৰ ৰেড বলৰ খেলৰ ভৱিষ্যতক লৈ প্ৰশ্ন উত্থাপন হৈছিল।

সেই ৰোহিত শৰ্মাই এইবাৰ ইংলেণ্ডৰ বিৰুদ্ধে পাঁচখন টেষ্টৰ ছিৰিজত দলটোক নেতৃত্ব দিবলৈ ওলাইছে বুলি বিচিচিআইৰ সূত্ৰই প্ৰকাশ কৰিছে। অৱশ্যে চেম্পিয়নছ ট্ৰফীত তেওঁৰ নেতৃত্বত অনবদ্য জয় আৰু চূড়ান্ত মেচত দেখুওৱা প্ৰদৰ্শনৰ সুবাদতে সেয়া আহিছে।

বাতৰি অনুসৰি, চেম্পিয়নছ ট্ৰফীত ৰোহিত শৰ্মাৰ সক্ষম নেতৃত্বই ব’ৰ্ড আৰু নিৰ্বাচকসকলৰ দৃষ্টি আকৰ্ষণ কৰিছে। ইংলেণ্ডৰ প্ৰত্যাহ্বানমূলক ভ্ৰমণত ভাৰতক নেতৃত্ব দিবলৈ ৰোহিত শৰ্মা যোগ্য বুলি তেওঁলোকৰ বিশ্বাস।

ক্ৰিকেটমহলে পৰৱৰ্তী আইচিচি বিশ্ব টেষ্ট চেম্পিয়নশ্বিপ (২০২৫-২৬)ৰ দৌৰ আৰম্ভ কৰাৰ ক্ষেত্ৰত এই ইংলেণ্ড ভ্ৰমণক বিশেষভাৱে গুৰুত্বপূৰ্ণ বুলি গণ্য কৰে।

সংবাদ মাধ্যমত প্ৰকাশিত তথ্য অনুসৰি ৰোহিতে নিজৰ যোগ্যতা প্ৰমাণ কৰিছে বুলি ব’ৰ্ড আশ্বস্ত হৈছে। ইংলেণ্ড ভ্ৰমণৰ নেতৃত্ব দিবলৈ তেওঁক আটাইতকৈ যোগ্য বুলি সকলোৱে ভাবে। ৰোহিতেও ৰেডবলৰ ক্ৰিকেট খেল অব্যাহত ৰখাৰ ইচ্ছা প্ৰকাশ কৰিছে।

চেম্পিয়নছ ট্ৰফী জয় কৰাৰ পিছত ৰোহিতে এতিয়াই অৱসৰ নলয় বুলি উল্লেখ কৰি সকলো জল্পনা-কল্পনাত পানী ঢালি দিলে। এদিনীয়াও খেলি থাকিব। আনকি ২০২৭ চনৰ বিশ্বকাপ সন্দৰ্ভতো তেওঁ ইতিবাচক কথা কোৱা শুনা গৈছে।

ৰোহিতে কয়, “মই এতিয়া ভাল খেলি আছো।দলৰ সৈতে কটোৱা এই সময়খিনি সঁচাকৈয়ে উপভোগ কৰিছো। দলৰ সকলোৱে মোৰ উপস্থিতি উপভোগ কৰি আছে। এইটো ভাল লাগিছে। ২০২৭ চনৰ কথা এতিয়াই ক’ব নোৱাৰো। বহু দেৰি আছে। কিন্তু মই সকলো বিকল্প খোলা ৰাখিছো।”

উল্লেখ্য যে অহা ২০ জুনত ইংলেণ্ডৰ বিৰুদ্ধে টেষ্ট শৃংখলা আৰম্ভ হ’ব।