হোজাইত ট্রেইনৰ চেইন টানি পলায়ন কৰা ৬০জনক কৰায়ত্ত; কুৱাৰেণ্টাইনত ভৰ্তি

আজি পুৱা হোজাইত ট্ৰেইনৰ চেইন টানি পলায়ন কৰা ৬০জন লোকক ৰে’লৱে আৰক্ষীয়ে কৰায়ত্ত কৰিছে।

উল্লেখযোগ্য যে আজি পুৱা প্ৰায় ১.৫৫ বজাত হোজাইৰ শিৱবাৰী লেভেল ক্ৰছিঙত মুম্বাইৰ পৰা ডিব্ৰুগড় অভিমুখী স্পেচিয়েল শ্ৰমিক ট্ৰেইনখন কোনো লোকে চেইন টানি ৰখাই দিছিল।

ঘটনাৰ খবৰ লাভ কৰি ৰে’লৱে আৰক্ষী ঘটনাস্থলীত উপস্থিত হৈ ইয়াৰ সৈতে জড়িত ৫৫ লোকক কৰায়ত্ত কৰিছিল যদিও ৫ গৰকী যুৱকে তাৰ পৰা পলায়ন কৰিছিল।

তেওঁলোকক ডবকা, লংকা আৰু হোজাইত থকা কুৱাৰেণ্টাইন চেণ্টাৰলৈ প্ৰেৰণ কৰা হয়। উক্ত ৫৫ গৰাকীৰ ৩১ গৰাকী জিলাখনৰ মুৰাঝাৰ অঞ্চলৰ, ১৬ গৰাকী লংকাৰ, ২ গৰাকী যমুনামুখৰ, ২ গৰাকী হোজাইৰ, ৪ গৰাকী ডবকাৰ আৰু ১ কাৰ্বি আংলঙৰ খেৰনিৰ।

আনহাতে পলায়ন ৫ গৰাকীক বিয়লিলৈ কৰায়ত্ত কৰি হোজাইৰ চৰকাৰী চিকিৎসালয়ত স্বাস্থ্য পৰীক্ষাৰ পিছত কুৱাৰেণ্টাইন চেণ্টাৰলৈ প্ৰেৰণ কৰা হয়।

হোজাই জিলাত বৰ্তমানলৈকে ১৮১ গৰাকী ব্যক্তি কোভিড-১৯ত আক্ৰান্ত হৈছে।