ডিগবৈত মহিলাৰ পৰা বাইকত অহা দুৰ্বৃত্তই লুটিলে ১১.৬ লাখ টকা
ডিগবৈত মটৰচাইকেলত অহা দুৰ্বৃত্তই সোমবাৰে এগৰাকী মহিলাৰ পৰা ১১.৬ লাখ টকা লুটি লৈ যায়।
মহিলাগৰাকীয়ে বেংকৰ পৰা ধন উলিয়াই ঘৰলৈ উভতি আহি থকাৰ সময়তে ঘটনাটো সংঘটিত হয়।
‘‘আমি য়ুনাইটেড বেংক অব ইণ্ডিয়াৰ পৰা টকাখিনি উলিয়াই ঘৰলৈ উভতি আহি থকাৰ সময়তে মটৰচাইকেলত উঠি অহা দুৰ্বৃত্তই থাপ মাৰি টকা থকা বেগটো লৈ যায়,’’ ভুক্তভোগী মহিলাগৰাকীৰ লগত অহা ভনীয়েক নমিতা চৌধুৰীয়ে কয়।
টকা ভৰ্তি বেগটো থাপ মাৰি ডকাইতৰ দলটোৱে ৩৮ নং ৰাষ্ট্ৰীয় ঘাইপথেৰে ৰামনগৰৰ ফালে পলাই যায় বুলি মহিলা দুগৰাকীৰ ভাষ্যত প্ৰকাশ পায়।
‘‘ডকাইতৰ দলটোৰ সৈতে টনা-আজোৰাত মোৰ কাপোৰ পৰ্যন্ত ফাটি যায়’’ নমিতা চৌধুৰীয়ে লগতে কয়।
উল্লেখযোগ্য যে, ডিগবৈৰ চি আৰ পি এফ কেম্পৰ য়ুবিআই ব্ৰাঞ্চৰ পৰা এল আই চিৰ মেছুৰিটিৰ টকাখিনি উলিয়াই আনন্দপাৰাৰ ঘৰলৈ আহি থকা অৱস্থাত ডকাইতি কাণ্ডটো সংঘটিত হয় বুলি মহিলাগৰাকীয়ে জানিবলৈ দিয়ে।
আনহাতে, সমগ্ৰ ঘটনাটো সন্দৰ্ভত মহিলা দুগৰাকীয়ে স্থানীয় আৰক্ষী থানাত এজাহাৰ দাখিল কৰিছে যদিও আৰক্ষীয়ে বৰ্তমানলৈ কোনো লোকক গ্ৰেপ্তাৰ কৰিবলৈ সক্ষম হোৱা নায়।