মাওবাদীৰ আক্ৰমণত চহিদ হোৱা নীৰজৰ পৰিয়াললৈ ২০ লাখ টকাৰ সাহায্য

যোৱা ১ জুন’ত ঝাৰখণ্ডত উগ্ৰপন্থীৰ ভয়াবহ আক্ৰমণত চহিদ হোৱা এছ এছ বি জোৱান নীৰজ চেত্ৰীৰ পৰিয়াললৈ ৰাজ্য চৰকাৰৰ তৰফৰ পৰা ২০ লাখ টকাৰ আৰ্থিক অনুদান প্ৰদান কৰিব। আজি এক প্ৰেছ বিজ্ঞপ্তিৰ জৰিয়তে মুখ্য মন্ত্ৰী সৰ্বানন্দ সোণোৱালে এই কথা ঘোষণা কৰে।

মুখ্য মন্ত্ৰী সোণোৱালে দেশ মাতৃৰ সুৰক্ষা আৰু নিৰাপত্তাৰ হকে প্ৰাণ আহুতি দিয়া বীৰ জোৱান গৰাকীৰ সাহসিকতাত সমগ্ৰ দেশবাসী গৌৰৱান্বিত বুলিও কয়।

ইয়াৰ উপৰি বিশ্বনাথ জিলাৰ গহপুৰ মহকুমাৰ অন্তৰ্গত কাউৰীপথাৰ অঞ্চলৰ কাৰিবিল নেপালী গাঁও নিবাসী এই গৰাকী সাহসী জোৱানৰ বিদেহ আত্মাৰ চিৰশান্তিৰ বাবে ভগৱানৰ ওচৰত প্ৰাৰ্থনা জনোৱাৰ উপৰি শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে মুখ্য মন্ত্ৰী সোণোৱালে।

উল্লেখযোগ্য যে ঝাৰখণ্ডৰ ডুমকা জিলাৰ কাথালিয়া গাঁৱত যোৱা ১ জুন অৰ্থাৎ দেওবাৰে সন্দেহযুক্ত মাওবাদীৰ আক্ৰমণত অসমৰ এইগৰাকী কেন্দ্ৰীয় আৰক্ষী বাহিনীৰ জোৱান নিহত হোৱাৰ উপৰি আন চাৰিগৰাকীকৈ জোৱান আহত হৈছিল।