ৰাছিয়া-ইউক্ৰেইন যুদ্ধ: ছিৰিয়াৰ অভিজ্ঞ যুঁজাৰু বাহিনী নিয়োগ কৰিছে ৰাছিয়াই!

ইউক্ৰেইনত নিজৰ শক্তিশালী সেনা বাহিনীৰ উপৰিও অভিজ্ঞ ছিৰিয়ান যুঁজাৰু বাহিনীক নিয়োগ কৰিছে ৰাছিয়াই। এক প্ৰতিবেদনত আমেৰিকা যুক্তৰাষ্ট্ৰৰ শীৰ্ষ বিষয়াৰ উদ্ধৃতি দি ৱাল ষ্ট্ৰীট জাৰ্নেলে এই কথা প্ৰকাশ কৰিছে।

প্ৰতিবেদন অনুসৰি, ৰাছিয়াই ইউক্ৰেইনৰ ৰাজধানী কিয়েভ দখলৰ লক্ষ্যৰে এই অভিজ্ঞ ছিৰিয়ান যুঁজাৰুসকলক নিয়োগ কৰিছে।

উল্লেখ্য যে ৰাছিয়াই ২০১৫ চনত ছিৰিয়াৰ গৃহযুদ্ধত ৰাষ্ট্ৰপতি বাছাৰ আল-আসাদৰ শাসনক সমৰ্থন কৰিছিল।

অৱশ্যে কিমান সংখ্যক ছিৰিয়ান যুঁজাৰু ৰাছিয়াই ইউক্ৰেইন যুদ্ধত নিয়োগ কৰিছে সেই বিষয়ে কোনো নিশ্চিত তথ্য নাই যদিও এক বুজন পৰিমাণৰ ছিৰিয়ান যুঁজাৰু ৰাছিয়াৰ সেনা বাহিনীৰ সৈতে সংযুক্ত আছে আমেৰিকাৰ বিষয়া সকলে দাবী কৰিছে।

আনহাতে ছিৰিয়ান যুঁজাৰু বাহিনীৰ লগতে আন বিদেশী যুঁজাৰু বাহিনীয়েও দুয়োপক্ষৰ পৰা যুদ্ধত অৱতীৰ্ণ হৈছে বুলিও প্ৰতিবেদনটোত উল্লেখ কৰা হৈছে।

ইউক্ৰেইন আক্ৰমণ কৰা ৰাছিয়ান সৈন্যৰ সৈতে চেচেন যুঁজাৰুসকলৰ উপস্থিতিৰ ভিডিঅ’ও সামাজিক মাধ্যমত বিয়পি পৰা দেখিবলৈ পোৱা গৈছে।

ইউক্ৰেনে দাবী কৰিছে যে প্ৰায় ২০,০০০ বহি: দেশৰ সেনাই স্বেচ্ছাই ইউক্ৰেইনৰ হৈ যুদ্ধত যোগদান কৰিছে।

উল্লেখ্য যে ৰাছিয়া আৰু ইউক্ৰেইন যুদ্ধই আজি ১২ দিনত ভৰি দিছে। যুদ্ধ আৰম্ভ হোৱাৰ পৰা এতিয়ালৈকে প্ৰায় ১.৫ নিযুতৰো অধিক লোকে দেশ এৰি পলাই গৈছে।