ইউক্ৰেইনত আমেৰিকা-ৰাছিয়াৰ যুদ্ধবিৰতি আলোচনা অন্ত পৰাৰ পাছতে পুনৰ তীব্ৰতৰ হৈ পৰিল যুদ্ধ
ৰাছিয়া-ইউক্ৰেইনৰ সংঘাতৰ মাজতে সামৰণি পৰে ইউক্ৰেইনত আংশিক যুদ্ধবিৰতি সন্দৰ্ভত ৰাছিয়া-আমেৰিকাৰ আলোচনা। দুই দেশৰ সংঘাতত হিংসাত্মক পৰিস্থিতি অব্যাহত থকাৰ মাজতে ইউক্ৰেইনত সম্ভাৱ্য আংশিক যুদ্ধবিৰতিৰ সন্দৰ্ভত ছৌদি আৰৱত ৰাছিয়া আৰু আমেৰিকাৰ বিষয়াসকলৰ মাজত ১২ ঘণ্টীয়া বৈঠক সমাপ্ত হয়।
এই আলোচনা চলি থকাৰ সময়তে উত্তৰ-পূব ইউক্ৰেইনৰ চুমিত ক্ষেপণাস্ত্ৰ আক্ৰমণত ১৭টা শিশুকে ধৰি প্ৰায় ৯০ জন লোক আহত হোৱা বুলি জানিব পৰা গৈছে। ইয়াৰ উপৰিও সংঘাতময় অঞ্চলত দুজন সাংবাদিকো নিহত হোৱাৰ খবৰ পোৱা গৈছে।
ৰাষ্ট্ৰপতি ড’নাল্ড ট্ৰাম্পে চৌদি আৰৱত আলোচনাৰ জৰিয়তে যুদ্ধৰ ক্ষীপ্ৰ সমাধান বিচাৰি উলিয়াব বুলি আশা কৰিছে। ৰিয়াদত থকা ইউক্ৰেইনৰ প্ৰতিনিধি দলটোৱে অধিক আলোচনাৰ বাবে আমেৰিকাৰ প্ৰতিনিধিৰ সৈতে অতিৰিক্ত বৈঠক অনুষ্ঠিত কৰাৰ সম্ভাৱনা প্ৰকাশ পাইছে।
অৱশ্যে ক্ৰেমলিনে কয় যে আলোচনা এতিয়াও প্ৰাৰম্ভিক পৰ্যায়ত আছে। ইফালে, আলোচনাৰ পূৰ্বে দুয়োপক্ষই নতুনকৈ ড্ৰ’ন আৰু চাইবাৰ আক্ৰমণত উত্তেজনা তীব্ৰ হৈ পৰিছে। ইউ কে আৰু ফ্ৰান্সৰ প্ৰতিৰক্ষা মুৰব্বীয়ে শান্তিৰক্ষাৰ প্ৰচেষ্টাৰ সম্ভাৱনাৰ বাবে সাজু হৈছে, যাতে যিকোনো যুদ্ধবিৰতি চুক্তিক সুৰক্ষিত কৰিবলৈ সৈন্য নিয়োগ কৰিব পৰা যাব।
ইউক্ৰেইনৰ পৰা খাদ্য ৰপ্তানিৰ সুবিধা প্ৰদান কৰা ‘ব্লেক চি’ পদক্ষেপ পুনৰ আৰম্ভ কৰাৰ সম্ভাৱ্য সন্ধানত আছে আমেৰিকা আৰু ৰাছিয়া। ট্ৰাম্পৰ ৩০ দিনীয়া যুদ্ধবিৰতিৰ প্ৰস্তাৱ পূৰ্বে ৰাছিয়াৰ ৰাষ্ট্ৰপতি ভ্লাদিমিৰ পুটিনে নাকচ কৰিছিল যদিও সম্ভাৱ্য চুক্তিৰ আলোচনা অব্যাহত আছে।