এবছৰ নৌহওতেই পুনৰ ভাৰত ভ্ৰমণলৈ পুটিন! নিশ্চিত কৰিছে ক্ৰেমলিনে
যোৱা বছৰৰ শেষৰ ফালে ইউক্ৰেইন যুদ্ধৰ পিছত প্ৰথমবাৰৰ বাবে ভাৰত ভ্ৰমণ কৰিছিল ৰাছিয়াৰ ৰাষ্ট্ৰপতি ভ্লাদিমিৰ পুটিনে। এবছৰ হোৱাৰ আগতেই হয়তো পুনৰ নতুন দিল্লীলৈ আহিব পুটিন। সেই সময়ত দেশত ব্ৰিকছ সন্মিলনৰ আয়োজন কৰা হ’ব। আৰু সেই সন্মিলনত অংশগ্ৰহণ কৰিবলৈ তেওঁ দেশলৈ আহিব। এই খবৰ ক্ৰেমলিনে নিশ্চিত কৰিছে।
যোৱা কেইবছৰমানৰ পৰা ব্ৰিকছৰ পৰিসৰ ক্ৰমান্বয়ে বৃদ্ধি পাইছে। ভাৰতৰ বাহিৰেও এই গোটত ব্ৰাজিল, ৰাছিয়া, চীন, দক্ষিণ আফ্ৰিকা, ইজিপ্ত, ইথিওপিয়া, ইৰাণ আৰু সংযুক্ত আৰব আমিৰশ্বাহী অন্তৰ্ভুক্ত। এই গোটটোৱে শাসন সংস্কাৰ, শক্তি সুৰক্ষা আৰু উন্নয়নৰ অগ্ৰাধিকাৰকে ধৰি বিশ্ব ৰাজনৈতিক আৰু অৰ্থনৈতিক বিষয়সমূহৰ ওপৰত সমন্বয়ৰ বাবে এক মঞ্চ হিচাপে কাম কৰে।
ইপিনে, আমেৰিকাৰ ৰাষ্ট্ৰপতি ড’নাল্ড ট্ৰাম্পে ব্ৰিকছক একেবাৰেই পছন্দ নকৰে। আচলতে তেওঁ দাবী কৰে যে ব্ৰিকছে ডলাৰক গুৰুত্বহীন কৰি সেই স্থান আন এখন দেশৰ মুদ্ৰাক দিব বিচাৰিছে। তেওঁ ডলাৰৰ অৱনমনৰ এই ‘প্ৰয়াস’ক সমালোচনা কৰা দেখা গৈছিল।
আমেৰিকাৰ ৰাষ্ট্ৰপতিগৰাকীয়ে কয় যে যিদৰে তেওঁ ডলাৰৰ বিশ্বব্যাপী মৰ্যাদা ৰক্ষাৰ বাবে প্ৰতিশ্ৰুতিবদ্ধ, তেনেকৈয়ে তেওঁ কেতিয়াও আমেৰিকাৰ কেন্দ্ৰীয় বেংকত ডিজিটেল মুদ্ৰা সৃষ্টি হ’বলৈ নিদিয়ে। কিন্তু ট্ৰাম্পৰ সকলো ভাবুকিৰ পিছতো ব্ৰিকছক সেও মনাব পৰা নাই। এইবাৰ পুনৰ এই সন্মিলন অনুষ্ঠিত হ’ব।
যুদ্ধৰ পৰিস্থিতিতো দীৰ্ঘকালীন ‘বন্ধু’ ৰাছিয়াই ভাৰতলৈ সহায়ৰ হাত আগবঢ়াইছে। ইতিমধ্যে মস্কোৱে ভাৰতৰ কাষত থিয় দিবলৈ সাজু বুলি কৈছে। ভাৰতৰ শক্তি যোগানত যদি কিবা সমস্যাৰ সৃষ্টি হয়, তেন্তে সেই চাহিদা পূৰণ কৰিবলৈ ৰাছিয়া সাজু।
ইয়াৰ মাজতে ৰয়টাৰ্ছে দাবী কৰিছে যে ভাৰতৰ জলসীমাৰ চাৰিওফালে মালবাহী জাহাজৰ বহৰ আছে। কিন্তু সেই বহৰত মুঠতে প্ৰায় ৯৫ লাখ বেৰেল তেল আছে। যদি ভাৰতে বিচাৰে, সেই নৌবহৰে কেইসপ্তাহমানৰ ভিতৰতে ভাৰতলৈ তেল যোগান ধৰিব।
ব্ৰিকছ শীৰ্ষ সন্মিলনলৈ যদি পুটিন আহে তেন্তে তেওঁ প্ৰধানমন্ত্ৰী মোডীৰ সৈতে তাৰ মাজতে দ্বিপাক্ষিক বৈঠকত মিলিত হ’ব পাৰে। বাণিজ্যৰ পৰা আৰম্ভ কৰি প্ৰতিৰক্ষালৈকে বিভিন্ন খণ্ডৰ ওপৰত দুয়োখন দেশৰ মাজত দীৰ্ঘদিনীয়া আলোচনা হ’ব পাৰে বুলিও ধাৰণা কৰা হৈছে।