ভাৰতৰ লগতে অসমৰ বিভিন্ন ছবিগৃহত মুক্তি লাভ কৰা চাহিদ কাপুৰৰ ‘কবিৰ সিং’ৰ এসপ্তাহৰ উপাৰ্জনে খলকনি লগাইছে বক্স অফিচত
অভিনেতা চাহিদ কাপুৰ অভিনীত সদ্যমুক্তি প্ৰাপ্ত ‘কবিৰ সিং’ চলচ্চিত্ৰখনে সমগ্ৰ দেশৰ লগতে অসমৰ ছবিগৃহতো দৰ্শকক আকৰ্ষণ কৰিবলৈ সক্ষম হৈছে। সম্পূৰ্ণ এসপ্তাহ গুৱাহাটী মহানগৰীৰ বিভিন্ন ছবিগৃহত সফলতাৰে প্ৰদৰ্শিত হয় ‘কবিৰ সিং’ নামৰ বলীউদৰ জনপ্ৰিয় চলচ্চিত্ৰখন।
আনহাতে, মুক্তিৰ প্ৰথম দিনটোতে ২০ কোটি টকা উপাৰ্জনেৰে চমক দিয়া ‘কবিৰ সিং’ ছবিখনে মুক্তিৰ এসপ্তাহৰ ভিতৰত ১০০ কোটি টকা উপাৰ্জন কৰি বলীউদৰ ১০০ কোটি ক্লাৱৰ চলচ্চিত্ৰৰ ভিতৰত নিজৰ নাম অন্তৰ্ভূক্ত কৰিবলৈ সক্ষম হয়।
সন্দীপ ৰেড্ডী বাংগাই পৰিচালনা কৰা ছবিখনত চাহিদ কাপুৰে কৰা শক্তিশালী অভিনয়ে চলচ্চিত্ৰপ্ৰেমীসকলৰ হৃদয়ত সাঁচ বহুৱাবলৈ সক্ষম হৈছে। ছবিখনে মুক্তিৰ প্ৰথম, দ্বিতীয় আৰু তৃতীয় দিনত ক্ৰমে ২০.২১ কোটি, ২২ কোটি আৰু ২৭ কোটি টকা উপাৰ্জন কৰি বক্স অফিচত খলকনি তুলিবলৈ সক্ষম হৈছে।
উল্লেখযোগ্য যে, পদ্মাৱতৰ পাছত মুক্তি লাভ কৰা চাহিদ কাপুৰৰ ‘কবিৰ সিং’ চলচ্চিত্ৰখন চাহিদৰ কেৰিয়াৰৰ এখন অন্যতম ব্যৱসায়িক সফল চলচ্চিত্ৰ হোৱাৰ পথত গতি কৰিছে।