বানপানীত আক্ৰান্ত লোকৰ খবৰ ল’বলৈ আহি নাও দুৰ্ঘটনাত কথমপি প্ৰাণ ৰক্ষা বিধায়ক ৰকিবুল হুছেইনৰ

বানপানীত ক্ষতিগ্ৰস্ত নগাঁও জিলাৰ চামগুৰি সমষ্টিৰ অন্তৰ্গত ভূৰবন্ধা, বগামুখ অঞ্চল পৰিদৰ্শন কৰিবলৈ আহি মঙলবাৰে নাও দুৰ্ঘটনাত পতিত হৈ কথমপি প্ৰাণ ৰক্ষা পৰে চামগুৰি সমষ্টিৰ বিধায়ক ৰকিবুল হুছেইনৰ। ৩ নং ভূৰবন্ধাত বানাক্ৰান্ত ৰাইজৰ খবৰ  লবলৈ আহি থকা সময়তে বিধায়কগৰাকীৰ নাওখন দুৰ্ঘটনাগ্ৰস্ত হয় যদিও দেহৰক্ষী আৰু উপস্থিত ৰাইজৰ তৎপৰতাত বিধায়কগৰাকীৰ কোনো ক্ষতি নহয়।

বানপানীত আক্ৰান্ত ৰাইজৰ খবৰ লৈ ৰকিবুলে বিপদৰ সময়ত বাঘে, ছাগে একেলগে বাস কৰি বুলি উল্লেখ কৰি এই সংকতৰ সময়ত ৰাজনীতি, ধৰ্ম আদি বিচাৰ কৰাৰ সময় নহয় বুলি মন্তব্য কৰে।

নগাঁও জিলাৰ চামগুৰি সমষ্টিৰ অন্তৰ্গত লাওখোৱা, ভূৰবন্ধা,বগামুখকে প্ৰমুখ্য কৰি প্ৰায় সাতখন গাঁৱৰ চাৰি হাজাৰৰো অধিক লোক ব্ৰহ্মপুত্ৰৰ বলিয়া বানৰ কৱলত পৰি দিক্-বিদিক হেৰুৱাৰ লগতে চৰকাৰী সাহায্য লাভৰ পৰা বঞ্চিত হোৱাত ভূক্তভোগী বানাক্ৰান্তসকল ক্ষুব্ধ হৈ পৰা পৰিলক্ষিত হৈছে।

বিশেষকৈ নেৰানেপেৰা বৰষুণৰ ফলত ব্ৰহ্মপুত্ৰৰ বাঢ়নি পানীয়ে তিনিটাকৈ কৃষি বান্ধ ভঙাৰ ফলত ১নং ,৩নং আৰু ৪ নং ভূৰবন্ধা গাঁও আৰু ৪নং,৫নং,৬নং আৰু ৭ নং বগামুখ গাঁও সম্পূৰ্ণ জলমগ্ন হৈ পৰাৰ ফলত ৩ নং ভূৰবন্ধা শান্তি বজাৰ মাথাউৰি আৰু পকী পথৰ ওপৰতে বানাক্ৰান্ত সকলো অস্থায়ী আশ্ৰয় গৃহ নিৰ্মাণ কৰি দুৰ্বিসহ জীৱন  যাপন কৰিব লগা হৈছে।

বানাক্ৰান্ত লোকসকলক প্ৰশাসনৰ ফালৰ পৰা সামান্য পৰিমাণৰ চাউল আৰু দালি যোগান ধৰিছে যদিও সকলো বানাক্ৰান্তই সমভাৱে চৰকাৰী সাহায্য নোপোৱাত ক্ষোভ ব্যক্ত কৰিছে।

আনহাতে, বান বিধ্বস্ত অঞ্চল সমূহত সামান্য পৰিমানৰ পানী কমিছে যদিও উক্ত অঞ্চল সমূহৰ বানাক্ৰান্তৰ মাজত বিশেষকৈ শিশু খাদ্য, পশুধনৰ খাদ্য, শৌচালয়ৰ ব্যৱস্থা , বিশুদ্ধ খোৱা পানী প্ৰশাসনৰ ফলৰ পৰা সঠিকভাৱে যোগান ধৰিব নোৱাৰাত ভূক্তভোগী সকলৰ স্বাস্থ্যৰ অৱনতি ঘটিছে ৷