চামগুৰিত চোৰৰ তৎপৰতা বৃদ্ধি

নগাঁৱৰ পুৰণিগুদাম, চামগুৰি আদি অঞ্চলত চোৰৰ উপদ্ৰৱ চলিছে।

শনিবাৰে নিশা চামগুৰিৰ পহুকটাত চোৰে কেইবাঘৰটো লুট-পাত চলাইছে।

পহুকটা আমনি গাঁৱৰ ঋষৱ গোস্বামীৰ ঘৰত মানুহ নথকাৰ সুযোগ লৈ চোৰৰ এটা দলে সন্তৰ্পণে তলা ভাঙি প্ৰবেশ কৰি বহু সময় ধৰি নৈশ যাপন কৰাৰ কথা পুৱাহে পোহৰলৈ আহে।

বিশেষ কাৰণত অৰুণাচল প্ৰদেশত থকা পৰিয়ালটোৰ ঘৰখনৰ পৰা বিভিন্ন সামগ্ৰী লুটপাট কৰি নিয়া বুলি সন্দেহ প্ৰকাশ কৰিছে স্থানীয় ৰাইজে।

লগতে লোক জনৰ ঘৰৰ কাষতে থকা গোসাঁই ঘৰৰো তলা ভাঙি লুটি নিলে দান পাত্ৰ। ইফালে সমীপৰে দীপক বৰা নামৰ আন এজন লোকৰ ঘৰৰ পৰাও চোৰৰ দলটোৱে গৃহস্থ শুই থকাৰ সুযোগ লৈ এটা পানীৰ পাম্প চোৰ কৰে।

উল্লেখযোগ্য যে, চামগুৰিত এতিয়া চোৰৰ মূল টাৰ্গেত হৈছে পানীৰ পাম্প, চাইকেল আদিৰ দৰে গৃহস্থই ঘৰৰ বাহিৰত ৰখা মূল্যৱান সামগ্ৰীসমূহ।

কিছুদিন পূৰ্বে পুৰণিগুদামৰ পানীগাওঁ কলিতাচুকটো চোৰৰ এটা দলে নিশা কেইবাজনো লোকৰ ঘৰৰ পৰা লুটি নিয়ে পানী পাম্প, চাইকেলকে আদি কৰি বহু কেইপদ মূল্যৱান সামগ্ৰী।

অৱশ্যে দেওবাৰে পুৱাৰ ভাগত চামগুৰি আৰক্ষীৰ এটা দল পহুকটাত উপস্থিত হৈ প্ৰাৰম্ভিক অনুসন্ধান আৰম্ভ কৰে যদিও গভাইত চোৰৰ দলটোক প্ৰকৃততে কৰায়ত্ত কৰিবলৈ সক্ষম হ’বনে নহয় তাকলৈ ৰাইজে গুণাগঁথা আৰম্ভ কৰিছে।