জীৱনৰ সোণালী সময় সদ ব্যৱহাৰৰ বাবে ছাত্ৰ-ছাত্ৰীসকলক আহ্বান মুখ্য মন্ত্ৰী সোণোৱালৰ
মুখ্য মন্ত্ৰী সৰ্বানন্দ সোণোৱালে আজি কৰিমগঞ্জ জিলাৰ বদৰপুৰস্থিত নবীন চন্দ্ৰ মহাবিদ্যালয়ৰ সোণালী জয়ন্তী উৎসৱৰ সামৰণি অনুষ্ঠানত মুখ্য অতিথি হিচাপে অংশগ্ৰহণ কৰে।
সোণালী জয়ন্তীৰ লগত সংগতি ৰাখি নিৰ্মাণ কৰা নবীন চন্দ্ৰ মহাবিদ্যালয়ৰ স্মৃতি তোৰণ এখনো আনুষ্ঠানিকভাৱে উন্মোচন কৰে সোণোৱালে।
এই উপলক্ষে আয়োজিত সভাত মুখ্য মন্ত্ৰীয়ে কয়, ‘ছাত্ৰ জীৱন হ’ল জীৱনৰ আটাইতকৈ সোণালী সময়। সেয়ে এই সময়খিনি কঠোৰ পৰিশ্ৰমেৰে সদ ব্যৱহাৰ কৰিব লাগে’।
প্ৰাক্তন ৰাষ্ট্ৰপতি, বিশিষ্ট বিজ্ঞানী ড০ এ পি জে আব্দুল কালামৰ উদ্ধৃতি দি মুখ্য মন্ত্ৰীয়ে কয় যে জীৱনৰ লক্ষ্য প্ৰাপ্তিৰ দিশত সফলতা আহৰণ কৰিবলৈ হ’লে কঠোৰ অধ্যৱসায়ত ব্ৰতী হ’ব লাগিব।
ছাত্ৰ-ছাত্ৰীসকলে নিজকে দক্ষ আৰু যোগ্য হিচাপে গঢ়ি তোলাৰ দিশত আত্ম নিয়োগ কৰিব লাগিব আৰু নিজৰ নিজৰ ক্ষেত্ৰ সমূহত উজলি উঠি নেতৃত্ব দিব পৰা গুণ আহৰণ কৰাৰ বাবে চেষ্টা কৰাৰ বাবেও উপদেশ দিয়ে।
মুখ্য মন্ত্ৰীৰ উপৰি এই অনুষ্ঠানত পৰিৱেশ আৰু বন বিভাগৰ মন্ত্ৰী পৰিমল শুক্লবৈদ্য, সাংসদ ৰাজদীপ ৰয়ৰ লগতে বহু কেইগৰাকী বিধায়ক আৰু মহাবিদ্যালয়খনৰ অধ্যক্ষ মুস্তাফা হুছেইনসহ বহু সংখ্যক গণ্য মান্য ব্যক্তি উপস্থিত থাকে।