শ্ৰীশ্ৰী বদলা পদ্ম আতা সত্ৰৰ শতায়ু গৰকা সত্ৰাধিকাৰ শ্ৰীকান্ত গোস্বামীৰ দেহাৱসান
শ্ৰী শ্ৰী বদলা পদ্ম আতা সত্ৰৰ সত্ৰাধিকাৰ শ্ৰীকান্ত গোস্বামীৰ দেওবাৰে পুৱা প্ৰায় ৭.৪৫ বজাত দেহাৱসান ঘটিছে।
১০৬ বছৰ বয়সত ইহলীলা সামৰা সত্ৰাধিকাৰগৰাকীয়ে নাৰায়ণপুৰত নিৰ্মাণ হৈ থকা শ্ৰীমন্ত মাধৱদেৱ কলাক্ষেত্ৰৰ ভূমিদান কৰিছিল।
অনাড়ম্বৰ জীৱন যাপন কৰা হাঁহিমুখীয়া সত্ৰাধিকাৰগৰাকীৰ মৃত্যুৱে বৃ্হত্তৰ নাৰায়ণপুৰ অঞ্চলত শোকৰ ছাঁ পেলাইছে।
শ্ৰীকান্ত গোস্বামীৰ মৃত্যুত মুখ্য মন্ত্ৰী সৰ্বানন্দ সোণোৱাল, বিত্ত মন্ত্ৰী হিমন্ত বিশ্ব শৰ্মা আৰু বিহপুৰীয়া বিধায়ক দেৱানন্দ হাজৰিকাই শোক প্ৰকাশ কৰিছে।
“জীৱনকালত একান্ত নিষ্ঠা আৰু ঐকান্তিকতাৰে প্ৰয়াত সত্ৰাধিকাৰ শ্ৰীকান্ত গোস্বামীয়ে সত্ৰৰ আধ্যাত্মিক, সাংস্কৃতিক দিশৰ প্ৰচাৰ আৰু প্ৰসাৰৰ লগতে সত্ৰখন সূচাৰুৰূপে পৰিচালনা কৰাৰ দিশত যি অৰিহণা আগবঢ়াই গ’ল সেয়া সত্ৰবাসীৰ লগতে সমগ্ৰ নাৰায়ণপুৰবাসীয়ে শ্ৰদ্ধাৰে স্মৰণ কৰিব,” মুখ্য মন্ত্ৰী সোণোৱালৰ শোকবাৰ্তাত প্ৰকাশ।
সত্ৰাধিকাৰগৰাকীৰ বদান্যতাৰ স্মৰণ কৰি মন্ত্ৰী হিমন্ত বিশ্ব শৰ্মাই কয় যে তেখেতৰ মহাপ্ৰয়াণে সৃষ্টি কৰা শূন্যতা সতকাই পূৰোৱা সম্ভৱ নহ’ব।
নাৰায়ণপুৰৰ ঐতিহ্যমণ্ডিত বদলা পদ্ম আতা সত্ৰৰ সত্ৰাধিকাৰ শ্ৰীশ্ৰীকান্ত গোস্বামীদেৱৰ দেহাৱসানত আমি মৰ্মাহত হৈছোঁ। শ্ৰীশ্ৰী গোস্বামীদেৱৰ বদান্যতাতেই শ্ৰীশ্ৰীমাধৱদেৱ কলাক্ষেত্ৰৰ ভূমি আমি লাভ কৰিছিলোঁ। তেখেতৰ মহাপ্ৰয়াণে আমাৰ মাজত যি শূন্যতাৰ সৃষ্টি কৰিলে তাক সটকাই পূৰোৱা সম্ভৱ নহ’ব। pic.twitter.com/cwWHmSRXA5
— Himanta Biswa Sarma (@himantabiswa) February 16, 2020