ফিফা বিশ্বকাপঃ চৌদি আৰৱৰ খেলুৱৈৱে লাভ নকৰে ৰোলছ ৰয়েছ বাহন

চৌদি আৰৱৰ খেলুৱৈৱে শেহতীয়াৰকৈ ফিফা বিশ্ব কাপত দেখুওৱা সুন্দৰ প্ৰদৰ্শনৰ বাবে দলটোৰ খেলুৱৈসকলক ৰোলছ ৰয়েছ বাহন উপহাৰ হিচাবে দিয়া হ’ব বিলি প্ৰচাৰিত বাতৰি ভুৱা বুলি কৈছে দলটোৰ প্ৰশিক্ষকে। তেনে কোনো সিদ্ধান্ত গ্ৰহণ কৰা হোৱা নাই বুলি প্ৰশিক্ষকগৰাকীয়ে স্পষ্ট কৰি দিছে।

চৌদি আৰৱ দলৰ মুখ্য প্ৰশিক্ষক হাৰ্ভ ৰেনাৰ্ডে আজি সংবাদমাধ্যমৰ আগত কয় যে আৰ্জেণ্টিনাৰ বিৰুদ্ধে বিশ্বকাপত বৃহৎ বিজয়ৰ পিছত দেশখনৰ ৰাজপৰিয়ালে গোটেই দলটোক ৰোলছ ৰয়েছ বাহন উপহাৰ দিব বুলি ওলোৱা খবৰ অপপ্ৰচাৰহে। তেনে কোনো সিদ্ধান্তই লোৱা হোৱা নাই।

উল্লেখ্য চৌদি আৰৱৰ ৰাজকুমাৰ মহম্মদ বিন ছলমান আল চাউদে চৌদি আৰৱৰ দলটোৰ প্ৰতিজন খেলুৱৈক আৰএম ৬ মিলিয়ন ৰোলছ ৰয়েছ ফেণ্টম উপহাৰ দিব বুলি শেহতীয়াকৈ ছ’চিয়েল মিডিয়াত ব্যাপক চৰ্চা হৈছিল।
ৰেনাৰ্ডে কয়, “আমাৰ এটা অতি গুৰুত্বপূৰ্ণ ফেডাৰেচন আৰু ক্ৰীড়া মন্ত্ৰালয় আছে আৰু এই মুহূৰ্তত কিবা এটা পোৱাৰ সময় নহয়। আমি কেৱল এখন খেলহে খেলিছো, গ্ৰুপ পৰ্যায়ৰ দুখন অতি গুৰুত্বপূৰ্ণ খেল এতিয়াও খেলিবলৈ আছেই। গতিকে এতিয়াই আমি ইমান বেছি একো আশা নকৰাই ভাল। দুয়ো খন খেলতে জিকিব পাৰিম বুলি আমি আশা কৰি আছোঁ।”