কাগজ কলৰ সংকট; বেচৰকাৰী সংস্থাক গুৱাহাটী উচ্চ ন্যায়ালয়ৰ কাষ চাপিবলৈ নিৰ্দেশ উচ্চতম ন্যায়ালয়ৰ

নগাঁও কাগজ কল পুনৰ মুকলি কৰাৰ বাবে এটা বেচৰকাৰী সংস্থাই (এন জি অ’) দাখিল কৰা এক আবেদনৰ শুনানি গ্ৰহণ কৰি উচ্চতম ন্যায়ালয়ে সোমবাৰে সংস্থাটোক উচ্চ ন্যায়ালয়ৰ কাষ চাপিবলৈ নিৰ্দেশ দিয়ে।

এই সন্দৰ্ভত পৰৱৰ্তী ন্যায়িক অনুশীলন গুৱাহাটী উচ্চ ন্যায়ালয়ত কৰিবলৈ সৰ্বোচ্চ ন্যায়ালয়ে সংস্থাটোক নিৰ্দেশ দিয়ে।

ৰাজ্যখনৰ দৃষ্টি ফাউণ্ডেশ্যন নামৰ এটা বেচৰকাৰী সংস্থাই দাখিল কৰা আবেদনৰ শুনানি গ্ৰহণ কৰি মুখ্য ন্যায়াধীশ ৰঞ্জন গগৈৰ নেতৃত্বৰ এখন বিচাৰপীঠে এইদৰে নিৰ্দেশ দিয়ে।

বিগত ২০১৫ চনৰ অক্টোবৰ আৰু ২০১৭ চনৰ মাৰ্চৰ পৰা ক্ৰমে কাছাৰ কাগজ কল আৰু নগাঁও কাগজ কলৰ কামকাজ বন্ধ হৈ পৰিছিল। তদুপৰি, দুবছৰৰো অধিক সময় ধৰি কৰ্মচাৰীসকলে দৰমহা লাভ কৰা নাই।

আনহাতে, ৰাজ্যসভাত কংগ্ৰেছ সাংসদ ৰিপুন বৰাৰ এক প্ৰশ্নৰ উত্তৰত চৰকাৰে স্পষ্ট কৰি দিছিল যে নেশ্যনেল কোম্পানী ল’ ট্ৰিবুউনেলৰ নিৰ্দেশ অনুসৰি কল দুটা বন্ধ কৰি দিয়া হৈছে।

ইপিনে যোৱা ১৯ জুনত অসমৰ এটা প্ৰতিনিধি দলক ৰাজহুৱা খণ্ড আৰু উদ্যোগ বিভাগৰ কেন্দ্ৰীয় মন্ত্ৰী অৰবিন্দ সাৱন্তে কাছাৰ আৰু নগাঁও কাগজ কল দুটা পুনৰুজ্জীৱিত কৰাৰ আশ্বাস প্ৰদান কৰিছিল।

কেন্দ্ৰীয় ৰাজ্যিক মন্ত্ৰী ৰামেশ্বৰ তেলী, মন্ত্ৰী পীযুষ হাজৰিকাসহ ৮ জনীয়া এটা সঁজাতি দলে কাছাৰ আৰু নগাঁও কাগজ কল পুনৰুজ্জীৱিত কৰাৰ সন্দৰ্ভত কেন্দ্ৰীয় মন্ত্ৰী অৰবিন্দ সাৱন্তৰ সৈতে আলোচনাত মিলিত হৈছিল।

তেওঁলোকে লগতে ৰাজহুৱা আৰু ব্যক্তিগত খণ্ডৰ উমৈহতীয়া ব্যৱস্থাৰ আৰ্হিত কাছাৰ আৰু নগাঁও কাগজ কলক গঢ় দিবলৈ কেন্দ্ৰীয় মন্ত্ৰীগৰাকীলৈ এক স্মাৰকপত্ৰও অসমৰ প্ৰতিনিধি দলটোৱে প্ৰদান কৰিছিল।

উল্লেখযোগ্য যে হিন্দুস্তান পেপাৰ কৰ্পোৰেশ্যনৰ অধীনত ১৯৭৮ চনত স্থাপন হৈছিল কাছাৰ আৰু নগাঁও কাগজ কল।