সোণোৱালৰ বিভাগত চি বি আই তদন্ত দাবী আছুৰ, ৰাজ্যজুৰি বিক্ষোভ

দুৰ্নীতিৰ বিৰুদ্ধে শূন্য সহনশীলতাৰ কথা দোহাৰি অহা মুখ্য মন্ত্ৰী সৰ্বানন্দ সোণোৱালৰ নিজৰ হাতত থকা বিভাগৰে চি বি আই তদন্ত দাবী কৰিছে সদৌ অসম ছাত্ৰ সন্থাই।

মুখ্য মন্ত্ৰীৰ নিজৰ দায়িত্বত থকা তথ্য আৰু জনসংযোগ আৰু মন্ত্ৰী নৱ দলেৰ পঞ্চায়ত আৰু গ্ৰামোন্নয়ন বিভাগৰ নিযুক্তিত ব্যাপক “গেৰুৱাকৰণ” আৰু “মুকলি বজাৰ” চলাৰ অভিযোগ তুলি ইয়াৰ চি বি আই বা ন্যায়িক তদন্ত দাবী কৰিছে আছুৱে।

“চৰকাৰৰ তদন্ত প্ৰক্ৰিয়াত আমি সন্তুষ্ট নহয়। ইয়াৰ ন্যায়িক বা চি বি আইৰ তদন্ত হ’ব লাগে। নিযুক্তি প্ৰক্ৰিয়াত পিছদুৱাৰেদি স্বজন-তোষণ দুৰ্নীতিৰে ভৰাৰ লগতে ইয়াক যি ধৰণে গেৰুৱাকৰণ কৰা হৈছে, তেনে অৱস্থাত মেধাসম্পন্ন প্ৰাৰ্থীয়ে কেনেকৈ ন্যায় পাব? এনেধৰণৰ দুৰ্নীতি সংঘটিত হোৱাৰ পাছতো দুৰ্নীতিৰ বিৰুদ্ধে শূন্য সহনশীলতাৰ কথা কোৱা বিজেপি চৰকাৰখন নীৰৱ হৈ আছে!” গুৱাহাটীৰ দীঘলীপুখুৰীপাৰত বুধবাৰে আছুৰ বিক্ষোভস্থলীত এই মন্তব্য সাধাৰণ সম্পাদক লুৰীনজ্যোতি গগৈৰ।

নিযুক্তি কেলেংকাৰিৰ উচিত তদন্ত কৰি দোষীক শাস্তি প্ৰদান নকৰিলে আন্দোলন অব্যাহত ৰখাৰ হুংকাৰ দি ছাত্ৰ নেতা গগৈয়ে বিভাগকেইটাৰ নিযুক্তি পৰীক্ষা অনুষ্ঠিত কৰা ব্লুম ইলেক্ট্ৰনিকচ নামৰ প্ৰতিষ্ঠানটোৰ বিৰুদ্ধেও ব্যৱস্থা গ্ৰহণৰ দাবী জনাইছে।

আনহাতে পঞ্চায়ত আৰু গ্ৰামোন্নয়ন বিভাগৰ নিযুক্তি কেলেংকাৰিত ৰাজ্য চৰকাৰৰ মন্ত্ৰী নৱ কুমাৰ দলে প্ৰত্যক্ষভাৱে জৰিত থকাৰো অভিযোগ তুলিছে আছুৱে। “নৱ কুমাৰ দলেই চাকৰিৰ মুকলি বজাৰ বন্ধ কৰিব লাগে,” কামৰূপ মহানগৰ জিলা ছাত্ৰ সন্থাৰ সভাপতি দিব্যজ্যোতি মেধিৰ মন্তব্য।

বুধবাৰে সংগঠনটোৱে সমগ্ৰ ৰাজ্যজুৰি সোণোৱাল চৰকাৰৰ “নিযুক্তি দুৰ্নীতি”ৰ বিৰুদ্ধে বিক্ষোভ প্ৰদৰ্শন কৰে।