অৰুণাচলৰ ৭খন জিলাত বছৰটোৰ প্ৰথম তুষাৰপাত : টাৱাঙৰ ছেলা পাছত যান-বাহনৰ চলাচল ব্যাহত

সমুদ্ৰপৃষ্ঠৰ পৰা ১৩,৭০০ ফুট উচ্চতাত অৱস্থিত টাৱাং জিলাৰ ছেলা পাছৰ বমডিলা-টাৱাং ৰ’ডত ১৭ ডিচেম্বৰ সোমবাৰৰ পুৱাৰে পৰা বছৰটোৰ প্ৰথম তুষাৰপাত হৈছে। এতিয়ালৈকে অৰুণাচলৰ ৭খন জিলাত শীতৰ প্ৰথম তুষাৰপাত হৈছে। ফলত যান-বাহনৰ চলাচলত যথেষ্ট অসুবিধাৰ সৃষ্টি হৈছে বুলি জাং জিলাৰ অতিৰিক্ত উপায়ুক্ত এল ডব্লিউ বাপুৱে প্ৰকাশ কৰিছে।

কেইদিনমানৰ পৰা যথেষ্ট মাত্ৰাত তুষাৰপাত হৈ থকাৰ বাবে মঙলবাৰৰ পৰা ছেলা পাছৰ সমীপৱৰ্তী এলেকাত ভালেমান যান-বাহন ৰৈ থাকিবলগীয়া হৈছে। আৰক্ষী আৰু সেনাৰ সহায়ত প্ৰশাসনে এই অসহায় লোকসকলক উদ্ধাৰ কৰিছে। অতিৰিক্ত উপায়ুক্তগৰাকীয়ে কৈছে।

টাইমছ অব ইণ্ডিয়াত প্ৰকাশিত এটা প্ৰতিৱেদন অনুসৰি, জিলা প্ৰশাসনে আশা কৰিছে যে বুধবাৰৰ পৰা বতৰ উন্নত হ’বলৈ ধৰিছে।

অতিৰিক্ত উপায়ুক্তগৰাকীয়ে জনোৱা মতে স্থানীয় বিশ্বাস অনুসৰি জানুৱাৰি মাহত বিখ্যাত টাৱাং মঠত ৩ দিনীয়াকৈ পালন কৰা টৰ্গিয়া উৎসৱৰ পূৰ্বে তুষাৰপাত হোৱাটো শুভ লক্ষণ।

পশ্চিম কামেঙ জিলাৰ বমডিলা, পূব ছিয়াং জিলাৰ মেচুখা পাহাৰ আৰু দিবং উপত্যকা জিলাৰ মায়ুডিয়াটো কেইদিনমান ধৰি তুষাৰপাত হৈ আছে।

এই বছৰ আনজাওৰ কিবিথু, লেমিকিং আৰু উজনি সোৱণশিৰিৰ টাকছিঙতো তুষাৰপাত হোৱাৰ বাতৰি পোৱা গৈছে। ৰাইজে শীতৰ প্ৰথম তুষাৰপাত উপভোগ কৰিছে আৰু বিভিন্ন স্থানত বনভোজৰো আয়োজন কৰিছে বুলি বিষয়াই জনাইছে।