বিশিষ্ট বুদ্ধিজীৱী ড০ হীৰেন গোহাঁইৰ বিৰুদ্ধে লতাশিল থানাত ৰাষ্ট্ৰদ্ৰোহৰ গোচৰ ৰুজু
বিশিষ্ট চিন্তাবিদ, বুদ্ধিজীৱী ড০ হীৰেন গোহাঁইৰ বিৰুদ্ধে ৰাষ্ট্ৰদ্ৰোহিতাৰ গোচৰ ৰুজু কৰা হৈছে। চৰকাৰ হৈ লতাশিল থানাত আৰক্ষীয়ে নিজাববীয়াকৈ গোচৰ ৰুজু কৰিছে। বিশিষ্ট চিন্তাবিদ তথা বুদ্ধিজীৱীগৰাকীৰ বিৰুদ্ধে দেশদ্ৰোহীতাৰ বিভিন্ন ধাৰাৰ জৰিয়তে ৰাষ্ট্ৰদ্ৰোহৰ অভিযোগ তোলা হৈছে।
ড০ গোহাঁইৰ লগতে অখিল গগৈ, মনজিৎ মহন্তৰ লগতে ৭ জানুৱাৰিত লতাশিলত অনুষ্ঠিত হোৱা প্ৰতিবাদী সভাত অংশগ্ৰহণ কৰা সকলোৰে বিৰুদ্ধে আৰক্ষীয়ে গোচৰ ৰুজু কৰিছে।
উল্লেখযোগ্য যে লতাশিলৰ উক্ত প্ৰতিবাদী সভাত স্বাধীন অসমৰ প্ৰসংগক ড০ গোহাঁয়ে সমৰ্থন কৰিছিল। অভিযোগ অনুসৰি অখিল গগৈয়ে প্ৰথমে স্বাধীন অসমৰ দাবী উত্থাপন কৰিছিল। ভাৰতীয় দণ্ডবিধি আইনৰ ১২০(বি)/২১২/১২৩/১২৪(A) ধাৰাৰ অধীনত ১৫/২০১৯ নম্বৰত এই গোচৰ ৰুজু কৰা হৈছে।
প্ৰতিবাদী সভাখনত নাগৰিকত্ব সংশোধনী বিধেয়কখনৰ বিৰোধিতা কৰি ড০ গোহাঁইয়ে কৈছিল যে যদি ভাৰত চৰকাৰ তথা অসম চৰকাৰে অসমৰ জনসাধাৰণৰ কথা নুশুনে, তেতিয়াহ’লে অসমৰ জনসাধাৰণে ‘স্বাধীনতা’ বিচাৰিব।
ছ’চিয়েল মিডিয়াত এই মন্তৱ্যৰ সপক্ষে তথা বিপক্ষে ব্যাপক চৰ্চা হৈছিল। ড০ গোহাঁইৰ বিৰুদ্ধে চৰকাৰে ৰুজু কৰা এই গোচৰ সন্দৰ্ভত প্ৰতিক্ৰিয়া প্ৰকাশ কৰি বিশিষ্ট সাংবাদিক হাইদৰ হুছেইনে কয় যে ‘’এইটো চৰকাৰৰ এটা আত্মঘাতীমূলক পদক্ষেপ। আমি এই বিষয়ে আলোচনা কৰি আছো আৰু শীঘ্ৰেই অসম চৰকাৰৰ এনে স্বৈৰাচাৰী মনোভাৱৰ বিৰুদ্ধে অধিক প্ৰতিবাদী কাৰ্যসূচী গ্ৰহণ কৰিম।‘’
আনহাতে, কৃষক মুক্তিৰ নেতা অখিল গগৈয়ে এই পদক্ষেপক অসম চৰকাৰৰ স্বেচ্ছাচাৰী কাৰ্য বুলি উল্লেখ কৰি ই জটিল পৰিস্থিতিৰ সৃষ্টি কৰিব বুলি সকীয়াই দিয়ে।