কোৱাৰেন্টাইনত থকা তবলিগী জামাতৰ জ্যেষ্ঠ সদস্য মিৰেল কুড্ডুছৰ জামাতি সকললৈ আহ্বান

যোৱা ১০ মাৰ্চৰ পাছত দিল্লীৰ নিজামুদ্দিনৰ মাৰ্কাজৰ পৰা উভতি অহাসকলক ওচৰৰ স্বাস্থ্য কেন্দ্ৰ বা প্ৰশাসনৰ সৈতে যোগাযোগ কৰিবলৈ আহ্বান জনায় অসমৰ  তবলিগী জামাতৰ জ্যেষ্ঠ সদস্য মিৰেল কুড্ডুছে।

“ইয়াত ভয় বা চিন্তাৰ কোনো কথা নাই। নিজৰ স্বাস্থ্যৰ সুৰক্ষাৰ বাবে ই জৰুৰী। এইক্ষেত্ৰত প্ৰশাসনক সহায় কৰাটো আমাৰ মৌলিক কৰ্তব্য,”-কুড্ডুছে সংবাদমাধ্যমলৈ প্ৰেৰণ কৰা ভিডিওটোত এইদৰে কয়।

তেওঁ লগতে প্ৰশাসন ব্যৱস্থাৰ শলাগ লৈ কয়, “প্ৰশাসন ব্যৱস্থাই ভাইৰাছ পৰীক্ষাৰ উত্তম ব্যৱস্থা কৰাৰ উপৰিও খাদ্য সামগ্ৰী, শোৱাৰ বাবে পৰিষ্কাৰ বিচনা, পানী, টুথপেস্ট, ব্ৰাছ, টাৱেল ইত্যাদি যোগানত কোনো ত্ৰুটি কৰা নাই।‘’

উল্লেখযোগ্য যে, যোৱা ৪ এপ্ৰিলৰ পৰা সৰুসজাই ষ্টেডিয়ামত কোৱাৰেন্টাইন হৈ আছে জ্যেষ্ঠ জামাতি তথা অভিনেতা মিৰেল কুড্ডুছ।

সৰুসজাই ষ্টেডিয়ামৰ অস্থায়ী শিবিৰৰ পৰিবেশ দেখি অভিভুত হৈ পৰিছে কুড্ডুছ।

“ষ্টেডিয়ামৰ এই পৰিবেশ স্বচক্ষে দেখি সঁচাকৈ মোহিত হৈছো। স্বাস্থ্য মন্ত্ৰী হিমন্ত বিশ্ব শৰ্মাৰ এই অপূৰ্ব ব্যৱস্থা বা পদক্ষেপ দেখি তবলিগীক জামাতৰ তৰফৰ পৰা আন্তৰিক ধন্যবাদ জ্ঞাপন কৰিলো,”-কুড্ডুছে এইদৰে কয়।

ইপিনে, যিসকলে বর্তমানলৈকে স্বাস্থ্য পৰীক্ষা কৰোৱা নাই তথা লুকাই আছে সেই সকলক প্ৰশাসনক বিচাৰি উলিয়াবলৈ আহ্বান জনোৱাৰ লগতে তবলিগী জামাতেও তথ্য পালে তেওঁলোকৰ বিৰুদ্ধে ব্যৱস্থা গ্ৰহণ কৰিব বুলি তেওঁ সদৰী কৰে।