অন্ধ্ৰ প্ৰদেশত মন্দিৰৰ দেৱাল ভাঙি নিহত ৭ গৰাকী ভক্ত

বুধবাৰে পুৱতি নিশা অন্ধ্ৰপ্ৰদেশৰ সিংহাচলম পাহাৰৰ শিখৰ মন্দিৰৰ সমীপৰ ৰিটেইনিং ৱাল ভাঙি পৰে। এই ঘটনাত তিনিগৰাকী মহিলাকে ধৰি ৭ জন ভক্তই প্ৰাণ হেৰুৱাই আৰু কেইবাজনো আহত হয়।

বিশেষ শাৰীত ভক্তসকল থিয় হৈ থকাৰ সময়তে পুৱা ৩:৩০ বজাৰ পৰা ৪:০০ বজাৰ ভিতৰত সংঘটিত হয় এই ঘটনা। হঠাতে হোৱা প্ৰচণ্ড বৰষুণ আৰু প্ৰচণ্ড বতাহৰ ফলত দেৱালখ ভাঙি পৰে বুলি জানিব পৰা গৈছে।

ঘটনাৰ পিছত তাৎক্ষণিকভাৱে এনডিআৰএফৰ জোৱানসকল ঘটনাস্থলীত উপস্থিত হয়।

মুখ্যমন্ত্রী এন চন্দ্রবাবু নাইডুৱে গভীৰ শোক প্রকাশ কৰি ছ’চিয়েল মিডিয়া প্লেটফৰ্ম এক্সত উল্লেখ কৰে যে, “তীব্র বৰষুণ আৰু বতাহৰ বাবেই এই ঘটনা সংঘটিত হৈছে৷ আহতসকলে উত্তম চিকিৎসা সেৱা লাভ কৰাটো নিশ্চিত কৰিবলৈ জিলা প্রশাসনক নির্দেশ দিছো আৰু ব্যক্তিগতভাৱে পৰিস্থিতি নিৰীক্ষণ কৰি আছো৷”

বিৰোধী দলৰ নেতা তথা প্ৰাক্তন মুখ্যমন্ত্ৰী ৱাই. জগন মোহন ৰেড্ডীয়ে এই কাণ্ডক লৈ ভক্তসকলে ঐশ্বৰিক আশীৰ্বাদ বিচাৰি প্ৰাণ হেৰুৱাই পেলোৱাটো “গভীৰ যন্ত্ৰণাদায়ক” বুলি অভিহিত কৰে। তেওঁ শোকসন্তপ্ত পৰিয়ালসমূহক সম্পূৰ্ণ সহায় আগবঢ়াবলৈ আৰু আহতসকলৰ বাবে শীৰ্ষ পৰ্যায়ৰ চিকিৎসা সুনিশ্চিত কৰিবলৈ ৰাজ্যখনক আহ্বান জনায়।