পুৰণিগুদামত ক’ভিড১৯ৰ হটস্পট বন্ধন বেংকৰ শাখা, সাত কৰ্মচাৰী পজিটিভ

শেহতীয়াকৈ বৃহত্তৰ পুৰণিগুদাম অঞ্চলত এসপ্তাহত প্ৰায় ১৫জনকৈ ব্যক্তিৰ দেহত ধৰা পৰিছে ক’ভিড-১৯ৰ অৱস্থিতি।

হটস্পত ৰূপে পৰিচিত হৈছে পুৰণিগুদামস্থিত বন্ধন বেংকৰ শাখা কাৰ্যালয়।

শেহতীয়াকৈ পুৰণিগুদাম ৰাজ্যিক চিকিৎসালয়ত কৰা ৰেপিড এণ্টিজেন টেষ্টত প্ৰথম অৱস্থাত বন্ধন বেংকৰ শাখাটোৰ ২জনকৈ কৰ্মচাৰীৰ দেহত আৰু পৰৱৰ্তী সময়ত ৫জনকৈ কৰ্মচাৰীৰ দেহত ক’ভিড-১৯+ ধৰা পৰে।

ফলত পুৰণিগুদামত সৰ্বত্ৰে এতিয়া আতংকময় পৰিৱেশৰ সৃষ্টি হৈছে।

কাৰণ ক’ভিড আক্ৰান্ত সেইসকল কৰ্মচাৰী ৰেপিড এণ্টিজেন টেষ্টৰ পূৰ্বে বিভিন্ন সময়ত বৃহত্তৰ পুৰণিগুদাম অঞ্চলৰ বহু গ্ৰাম্যাঞ্চললৈ গৈ বন্ধন গোটৰ সভা-সমিতিত ভাগ লৈছিল।

কিন্তু অতি আশ্চৰ্যজনক কথাটো এয়ে যে, ইমানৰ পিছতো পুৰণিগুদাম বজাৰ এলেকাৰ লগতে অঞ্চলটোৰ বিভিন্ন ৰাজহুৱা স্থানত বহু লোকৰ সমাগম পৰিলক্ষিত হৈ অহাক কেন্দ্ৰ কৰি অঞ্চলটোত ক’ৰণাৰ দ্ৰুত সংক্ৰমণৰ সম্ভাৱনীয়তা যে আহি পৰিছে ইয়াৰ বিষয়ে বহুলভাৱে চৰ্চা চলিছে সচেতন মহলৰ মাজত।

বিপৰীতে চামগুৰিৰ আমনি, চামগুৰি বজাৰৰ লগতে মিছা আদি বহু কেইখন ঠাইত ক’ৰনাৰ ভয়াৱহ সংক্ৰমণৰ প্ৰতি লক্ষ্য ৰাখি ৰাইজ তথা ব্যৱসায়ী সকলে স্বইচ্ছাৰে “জনতাৰ লক্ ডাউন” জাৰি কৰা পৰিলক্ষিত হৈছে।

পৰৱৰ্তী সময়ত পুৰণিগুদামৰ ব্যৱসায়ী তথা ইয়াৰ সচেতন মহলে বৃহত্তৰ অঞ্চলটোত ক’ৰনাৰ সংক্ৰমণ ৰোধৰ ক্ষেত্ৰত কেনে ধৰণৰ ব্যৱস্থা গ্ৰহণ কৰিব সেয়া পৰৱৰ্তী সময়ত লক্ষণীয় হ’ব।