শ্বেয়াৰ বজাৰত ভয়ংকৰ খহনীয়া, এদিনতে বিনিয়োগকাৰীৰ ছয় লাখ কোটি টকাৰ লোকচান, ছেনছেক্সৰ ৯০০ পইণ্টৰ পতন
ভাৰতীয় শ্বেয়াৰ বজাৰ মঙলবাৰে এটা বৃহৎ পতনৰ সৈতে বন্ধ হয়। বোম্বাই ষ্টক এক্সচেঞ্জৰ সূচাংক ছেনছেক্স ১.১৬ শতাংশ বা ৮৯৩ পইণ্ট হ্ৰাস পাই ৭৬,২০০ পইণ্টত বন্ধ হয়। বজাৰ বন্ধ হোৱাৰ সময়ত ছেনছেক্সৰ ৩০ টা শ্বেয়াৰৰ ভিতৰত ২৮ টা শ্বেয়াৰৰ মূল্য হ্ৰাস পায় আৰু মাত্ৰ ২ টা শ্বেয়াৰৰ মূল্যহে বৃদ্ধি হোৱা দেখা যায়। আনহাতে ৰাষ্ট্ৰীয় ষ্টক এক্সচেঞ্জৰ সূচাংক নিফটী ১.১৬ শতাংশ বা ২৭৮ পইণ্ট হ্ৰাস পাই ২৩,৮২৪ পইণ্টত বন্ধ হয়। নিফটী বেংক ১.৩০ শতাংশ আৰু নিফটী তথ্য প্ৰযুক্তি সূচাংক ২.২৩ শতাংশ হ্ৰাস পায়। এই বৃহৎ পতনৰ ফলত মাত্ৰ ১ দিনতে বিনিয়োগকাৰীসকলৰ প্ৰায় ৬ লাখ কোটি টকাৰ বৃহৎ লোকচান হয়।
বিভিন্ন খণ্ডৰ সূচাংকসমূহৰ বিষয়ে কবলৈ গলে আজি আটাইতকৈ বেছি লোকচান হয় ধাতু আৰু তথ্য প্ৰযুক্তি খণ্ডৰ শ্বেয়াৰসমূহত। নিফটী ধাতু সূচাংক ৩.২২ শতাংশ আৰু তথ্য প্ৰযুক্তি সূচাংক ২.২৩ শতাংশ হ্ৰাস পায়। ইয়াৰ উপৰিও নিফটী সংবাদ মাধ্যম ১.৪৭ শতাংশ, নিফটী মটৰগাড়ী খণ্ড ০.৭৭ শতাংশ, ৰাজহুৱা খণ্ডৰ বেংক ১.৯৭ শতাংশ, ব্যক্তিগত খণ্ডৰ বেংক ০.৭৭ শতাংশ, নিফটী ৰিয়েলটী ১.১২ শতাংশ, গ্ৰাহক সামগ্ৰী ১.৫০ শতাংশ আৰু তেল আৰু গেছ খণ্ড ০.৯০ শতাংশ হ্ৰাস পায়।
শ্বেয়াৰ বজাৰৰ এই দ্ৰুত পতনৰ আঁৰত মূলতঃ ৪ টা কাৰণ আছে। প্ৰথমতে, দক্ষিণ কোৰিয়াৰ শ্বেয়াৰ বজাৰত অভিলেখ সৃষ্টি কৰা উচ্চ পৰ্যায়ৰ পৰা ভয়ংকৰ পতন ঘটিছে। বিনিয়োগকাৰীসকলে কৃত্ৰিম বুদ্ধিমত্তা বা প্ৰযুক্তি কোম্পানীসমূহৰ শ্বেয়াৰ ব্যাপক হাৰত বিক্ৰী কৰিছে। এই কোম্পানীসমূহৰ উত্থানৰ বুৰবুৰণি ফাটি যোৱাৰ আশংকাত বিনিয়োগকাৰীসকল চিন্তিত হৈ পৰিছে। দক্ষিণ কোৰিয়াৰ প্ৰধান সূচাংক কছপি আজি ৯.৯৯ শতাংশ হ্ৰাস পায়। বিগত ৩ মাহৰ ভিতৰত এয়া আটাইতকৈ দ্ৰুত পতন। এই পতনৰ বাবে কোৰিয়া এক্সচেঞ্জে ২০ মিনিটৰ বাবে লেনদেন বন্ধ ৰাখিবলগীয়া হৈছিল। ইয়াৰ পোনপটীয়া প্ৰভাৱ ভাৰতীয় তথ্য প্ৰযুক্তি কোম্পানীসমূহৰ ওপৰতো পৰে। সোমবাৰৰ উত্থানৰ পিছত তথ্য প্ৰযুক্তি শ্বেয়াৰসমূহত পুনৰ বিক্ৰী আৰম্ভ হয় যাৰ ফলত দেশৰ আগশাৰীৰ প্ৰযুক্তি কোম্পানীসমূহৰ শ্বেয়াৰ ৩ শতাংশতকৈয়ো অধিক হ্ৰাস পায়।
আনহাতে, মধ্য প্ৰাচ্যত উত্তেজনা কিছু পৰিমাণে হ্ৰাস পালেও আমেৰিকা যুক্তৰাষ্ট্ৰৰ কেন্দ্ৰীয় বেংক ফেডাৰেল ৰিজাৰ্ভৰ সুতৰ হাৰ বৃদ্ধি পোৱাৰ আশংকাই বজাৰত বিৰূপ প্ৰভাৱ পেলাইছে। ইৰাণ আৰু আমেৰিকাৰ শান্তি আলোচনা সফল নহলে এই আশংকা আৰু অধিক বৃদ্ধি পাব পাৰে। ডিচেম্বৰ মাহত ফেডাৰেল ৰিজাৰ্ভৰ সুতৰ হাৰ বৃদ্ধি পোৱাৰ সম্ভাৱনা ৮৮ শতাংশ বুলি ব্যৱসায়ীসকলে ধাৰণা কৰিছে, যিটো যোৱা সপ্তাহত ৬১ শতাংশ আছিল। সুতৰ হাৰ বৃদ্ধিৰ এই আশংকাই বিনিয়োগকাৰীসকলৰ মনোবল দুৰ্বল কৰি তুলিছে। ইয়াৰ সমান্তৰালভাৱে ভাৰতীয় মুদ্ৰা টকাৰ মূল্যও হ্ৰাস পাইছে। আমেৰিকান ডলাৰৰ বিপৰীতে ভাৰতীয় টকা ০.১৬ শতাংশ হ্ৰাস পাই ৯৪.৮২ টকাত অৱতীৰ্ণ হৈছে। এই সকলোবোৰ কাৰণৰ বাবে বৰ্তমান বিনিয়োগকাৰীসকলে ভাৰতত দীৰ্ঘম্যাদী বিনিয়োগৰ পৰা বিৰত থকা দেখা গৈছে।