বেটিং কৰি থাকোতেই বেয়াকৈ আঘাত পালে চাহিদ কাপুৰে

কবিৰ সিঙৰ দৰে ব্লকবাষ্টাৰ ছবি উপহাৰ দিয়া চাহিদ কাপুৰক দৰ্শকে এইবাৰ দেখা পাব ‘জাৰ্চি’ নামৰ এখনত চিনেমাত। চাহিদে ছবিখনত এগৰাকী ক্ৰিকেটাৰৰ চৰিত্ৰত অভিনয় কৰিব।

পিংকভিলা নামৰ এটা ৱেবছাইটৰ মতে ছবিখনৰ শ্বুটিঙৰ সময়ত অভিনেতা গৰাকী বেয়াকৈ আঘাতপ্ৰাপ্ত হৈছে।

অভিনেতাগৰাকীৰ আঘাত সম্পৰ্কে ৱেবছাইটটোৱে লিখিছে, ‘আখৰা কৰি থকাৰ সময়তে এটা বল আহি চাহিদৰ ওঁঠত আঘাত কৰে। ওঁঠেৰে তেজ ওলোৱাত লগে লগে তেওঁক চিকিৎসালয়ত ভৰ্তি কৰোৱা হয়। সম্পূৰ্ণৰূপে সুস্থ নোহোৱা পৰ্যন্ত তেওঁ শ্বুটিঙত অংশ ল’ব নোৱাৰিব’।

উল্লেখ্য যে হিন্দী ভাষাত নিৰ্মাণ হ’বলগীয়া এই ছবিখন তেলেগু চিনেমাৰ ৰিমেক। ছবিখন চলিত বছৰৰ ২৮ আগষ্টত মুক্তি লাভ কৰাৰ সম্ভাৱনা আছে।

ছবিখন সন্দৰ্ভত ব্যাপক উৎসাহী হৈ থকা চাহিদ কাপুৰে শেহতীয়াকৈ এটা সাক্ষাৎকাৰত কয়, ‘এই ছবিখনে মোক অত্যন্ত প্ৰভাৱিত কৰিছিল। এইখন এখন আৱেগিক চিনেমা। দুয়োখন চিনেমাৰে বেলেগ বেলেগ পৰিচয় থাকিব। মই ৮৩ চিনেমাখন চাবলৈও অধীৰ আগ্ৰহেৰে ৰৈ আছো’।