বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক মৃত্যুদণ্ডৰ শাস্তি

বাংলাদেশৰ ৰাজনৈতিক ইতিহাসৰ এক গুৰুত্বপূৰ্ণ ক্ষণত, দেশৰ প্ৰাক্তন প্ৰধানমন্ত্ৰী শ্বেখ হাছিনাক মানৱতাৰ বিৰুদ্ধে অপৰাধত দোষী সাব্যস্ত কৰি মৃত্যুদণ্ডৰ শাস্তি ঘোষণা কৰা হৈছে। আন্তঃৰাষ্ট্ৰীয় অপৰাধ ন্যায়াধিকৰণে (ICT) তেওঁৰ শাস্তি ঘোষণা কৰাৰ লগে লগে আদালত কক্ষটো কৰতালেৰে মুখৰিত হৈ উঠে।

শেহতীয়া খবৰ অনুসৰি, হাছিনাক মূলতঃ নিৰস্ত্ৰ প্ৰতিবাদীক মাৰণাস্ত্ৰৰে আক্ৰমণৰ নিৰ্দেশ দিয়াৰ অপৰাধত দোষী সাব্যস্ত কৰা হৈছে।

৫ আগষ্টত সংঘটিত হোৱা সেই ঘটনাত, হাছিনাৰ নিৰ্দেশতেই প্ৰতিবাদীক মাৰণাস্ত্ৰৰে আক্ৰমণ কৰা হৈছিল বুলি প্ৰমাণিত হৈছে। তেওঁৰ বিৰুদ্ধে ৬ জন প্ৰতিবাদীক হত্যাৰ নিৰ্দেশ দিয়াৰ অভিযোগ আছিল।

প্ৰাক্তন প্ৰধানমন্ত্ৰী শ্বেখ হাছিনাৰ বিৰুদ্ধে মানৱতাৰ বিৰুদ্ধে অপৰাধ আৰু হত্যাকে ধৰি মুঠ ৫টা গোচৰ চলি আছিল।

তিনিজন সদস্যৰে গঠিত ট্ৰিবিউনেলে নিজৰ ৪৫৩ পৃষ্ঠাৰ সিদ্ধান্ত প্ৰকাশ কৰে। এই ট্ৰিবিউনেলৰ নেতৃত্বত আছিল জাষ্টিচ মহম্মদ গুলাম মুৰ্তাজা মজুমদাৰ।

তেওঁক পৃথক পৃথক গোচৰত দোষী সাব্যস্ত কৰি আন্তঃৰাষ্ট্ৰীয় অপৰাধ ন্যায়াধিকৰণে মৃত্যুদণ্ডৰ শাস্তি বিহিছে।

ন্যায়াধীশৰ মতে, এই গোচৰটো অতি গুৰুত্বপূৰ্ণ আৰু গভীৰ আছিল, যাৰ ফলত সিদ্ধান্তও ৬টা ভাগত দিয়া হৈছে। এই ৰায়ে বাংলাদেশৰ ৰাজনৈতিক ক্ষেত্ৰত এক বৃহৎ প্ৰভাৱ পেলোৱাটো নিশ্চিত।