টেণ্ডুলকাৰৰ বাবে আখটাৰৰ এটা বিশেষ টুইট, ‘প্ৰিয় প্ৰতিদ্বন্দ্বী’ আখ্যা টেণ্ডুলকাৰক
প্ৰাক্তন পাকিস্তানী স্পীডষ্টাৰ চোৱেইব আখটাৰৰ শেহতীয়া এটা টুইটে অনুৰাগীসকলক মন মুহি নিছে।
টুইটটোত তেওঁ কিংম্বদন্তি ক্ৰিকেটাৰ শচীন টেণ্ডুলকাৰৰ সৈতে এখন পুৰণা ফটো শ্বেয়াৰ কৰিছে।
উল্লেখযোগ্য যে টেণ্ডুলকাৰ বৰ্তমান ক’ভিড-১৯ত আক্ৰান্ত হৈ আছে।
সেইবাবে আখটাৰে টেণ্ডুলকাৰক সোনকালে ক’ভিডৰ পৰা আৰোগ্য লাভ কৰাৰ বাবে টুইটটোত আশাপ্ৰকাশ কৰিছে।
One of my favorite rivalries on the ground. Get well soon buddy @sachin_rt pic.twitter.com/mAleuepcwM
— Shoaib Akhtar (@shoaib100mph) March 30, 2021
টুইটটোত তেওঁ আৰু টেণ্ডুলকাৰৰ ফটোখন ১৯৯৯-২০০০ চনৰ অষ্ট্ৰেলিয়া-ভাৰত-পাকিস্তান ত্ৰিদেশীয় শৃংখলাৰ সময়ছোৱাত।
টুইটটোত তেওঁ লিখিছে যে টেণ্ডুলকাৰ হৈছে খেলপথাৰত তেওঁৰ অন্যতম প্ৰিয় প্ৰতিদ্বন্দ্বী।
উল্লেখযোগ্য যে টেণ্ডুলকাৰ আৰু আখটাৰৰ খেলপথাৰত বহুকেইটা প্ৰতিদ্বন্দ্বিতাই এসময়ত উত্তেজনাৰ সৃষ্টি কৰিছিল।
টেণ্ডুলকাৰ হৈছে বিশ্ব ক্ৰিকেটৰ অন্যতম শ্ৰেষ্ঠ বেটছমেন, আনহাতে আখটাৰ হৈছে অন্যতম শ্ৰেষ্ঠ ফাষ্ট বলাৰ।
তেওঁলোকৰ প্ৰতিদ্বন্দ্বিতাৰ সূত্ৰপাত ঘটে ১৯৯৯ চনৰ কলকাতাৰ এখন টেষ্ট মেচত।
মেচখনত আখটাৰে টেণ্ডুলকাৰক শূণ্য ৰাণতে পেভিলিয়নমুখী কৰে।
তাৰপাছত টেণ্ডুলকাৰে আখটাৰক প্ৰতিশোধ লয় ২০০৩ চনৰ বিশ্বকাপত মুখামুখী হওতে।
দক্ষিণ আফ্ৰিকাৰ চেঞ্চুৰিয়নত অনুষ্ঠিত মেচখনত টেণ্ডুলকাৰে আখটাৰৰ এটা তীব্ৰবেগী বল স্কোৱাৰ কাট কৰি ছয় কোবোৱাটো ভাৰতীয় ক্ৰিকেট অনুৰাগীসকলৰ বাবে স্মৰণীয় মুহূৰ্ত।
আখটাৰে টেণ্ডুলকাৰক ৩বাৰ টেষ্টত আউট কৰাৰ বিপৰীতে এদিনীয়া মেচত কৰিছিল ৯বাৰ।