সিদ্ধু মুছেৱালা হত্যাকাণ্ড গোচৰত আজাৰবাইজানত আটক গেংষ্টাৰ লৰেন্স বিষ্ণৈৰ সহায়ক
যোৱা ২৯ মে’ত দেশজুৰি চাঞ্চল্যৰ সৃষ্টি কৰা পঞ্জাৱী গায়ক সিদ্ধু মুছেৱালা হত্যাকাণ্ড সন্দৰ্ভত আজাৰবাইজানত আটক কৰা হৈছে গেংষ্টাৰ লৰেন্স বিষ্ণৈইৰ এগৰাকী সহায়কক। ধৃত ব্যক্তিগৰাকীক শচীন বিষ্ণৈ বুলি চিনাক্ত কৰা হৈছে।
সিদ্ধু মুছেৱালাৰ হত্যাৰ দায়িত্ব স্বীকাৰ কৰাৰ পিছৰে পৰা পলাতক অৱস্থাত আছিল শচীন বিষ্ণৈ। আন্তৰ্জাতিক ভ্ৰমণৰ বাবে এখন ভুৱা পাছপ’ৰ্ট ব্যৱহাৰ কৰিছিল অভিযুক্ত বিষ্ণৈয়ে। ইয়াৰ বাবে নিজৰ পৰিচয় তিলক ৰাজ টোটেজালৈ সলনি কৰিছিল অভিযুক্তগৰাকীয়ে।
দিল্লী আৰক্ষীয়ে জানিবলৈ দিয়া মতে মুছেৱালা হত্যাকাণ্ডৰ এগৰাকী মুখ্য ষড়যন্ত্ৰকাৰী শচীন হত্যাকাণ্ডৰ এমাহৰ পূৰ্বে ভাৰতৰ পৰা পলাই গৈছিল।
সূত্ৰ অনুসৰি, এমাহ পূৰ্বে আজাৰবাইজানৰ নিৰাপত্তা সংস্থাসমূহে শচীন বিষ্ণৈইক আটক কৰিছিল আৰু তেতিয়াৰ পৰাই পঞ্জাৱ আৰক্ষীৰ শীৰ্ষ বিষয়াসকলে সম্পূৰ্ণ ঘটনাক্ৰমৰ ওপৰত তীক্ষ্ণ নজৰ ৰাখিছিল।
ইতিমধ্যে পঞ্জাৱ আৰক্ষীয়ে আজাৰবাইজান আৰক্ষীৰ সৈতে যোগাযোগ কৰি শচীন বিষ্ণৈইক ভাৰতলৈ ঘূৰাই অনাৰ প্ৰক্ৰিয়া আৰম্ভ কৰিছে। পঞ্জাৱ আৰক্ষীৰ এগৰাকী শীৰ্ষ বিষয়াই জানিবলৈ দিয়া মতে শীঘ্ৰেই শচীনক পঞ্জাৱলৈ অনা হ’ব আৰু সোধা-পোছা আৰম্ভ কৰিব।
ইতিপূৰ্বে যোৱা মাহত আম্বালা আৰক্ষীয়ে হত্যাকাণ্ডত জড়িত গোল্ডি ব্ৰাৰ দলৰ চাৰিজন শ্বুটাৰক গ্ৰেপ্তাৰ কৰিছিল। শ্বুটাৰসকলে কানাডাস্থিত গেংষ্টাৰ গোল্ডি ব্ৰাৰৰ হৈ কাম কৰি আছিল।