CAA-ক সমৰ্থন পাকিস্তানৰ পৰা আহি ভাৰতীয় নাগৰিকত্ব লাভ কৰা বলিউদৰ কণ্ঠশিল্পী আদনান শ্বামীৰ

ভাৰতীয় নাগৰিকত্ব লাভ কৰা পূৰ্বৰ পাকিস্তানী কণ্ঠশিল্পী আদনান শ্বামীৰ নাম ভাৰত চৰকাৰে কিছু দিন পূৰ্বে পদ্মশ্ৰী সন্মানৰ বাবে ঘোষণা কৰিছে।

এই বঁটাৰ বাবে শ্বামীৰ নাম ঘোষণা কৰাৰ পাছত বহুকেইটা সাক্ষাৎকাৰত শ্বামীক এন আৰ চি আৰু কা সম্পৰ্কত প্ৰশ্ন কৰাত সেই বিষয়ত উত্তৰ দিয়াৰ পৰা বিৰত আছিল সংগীত শিল্পী গৰাকী।

কিন্তু অৱশেষত কা সম্পৰ্কত নিজৰ মতামত প্ৰকাশ কৰি আইনখনৰ প্ৰতি নিজৰ সমৰ্থন ব্যক্ত কৰে কণ্ঠশিল্পী আদনান শ্বামীয়ে।

‘পাকিস্তানত সংখ্যালঘু সকলে কি ধৰণৰ সমস্যাৰ সৈতে সংঘৰ্ষ কৰিবলগীয়া হয় মই নিজ চকুৰে দেখিছো,’ এটা সাক্ষাৎকাৰত আদনান শ্বামীয়ে কয়।

‘পাকিস্তানৰ ৰাজধানী ইছলামাবাদতো আনকি কিদৰে তাৰ সমাজ বহু গোটত বিভক্ত সেয়া মই দেখিছো। মই ইছলামাবাদত কাম কৰি থকা ঠাইৰ ওচৰতে এটা বস্তি অঞ্চল আছিল আৰু মই সেই লোকসকল কোনো বুলি প্ৰশ্ন কৰাত মোক খ্ৰীষ্টিয়ান লোক বুলি জনিবলৈ দিছিল,’ শ্বামীয়ে লগতে কয়।

‘কা’ৰ জৰিয়তে পাকিস্তান, বাংলাদেশ আৰু আফগানিস্তানৰ সংখ্যালঘু লোকসকলে ভাৰতৰ নাগৰিকত্বৰ বাবে আবেদন কৰিব পাৰিব আৰু পূৰ্বতকৈ কম সময়তে ভাৰতৰ নাগৰিকত্ব লাভ কৰিব যাৰ ফলত তেওঁলোকৰ দুখ-কষ্ট কিছু কম হ’ব বুলিও বলিউদৰ বিখ্যাত কণ্ঠশিল্পী গৰাকীয়ে কয়।

উল্লেখযোগ্য যে, আদনান শ্বামীৰ উপৰিও কংগনা ৰানাৱত, প্ৰযোজক একতা কাপুৰ নিৰ্দেশক কৰণ জোহৰকো পদ্মশ্ৰী সন্মান প্ৰদান কৰা হ’ব।

বলিউদৰ বহু তাৰকাই নাগৰিকত্ব(সংশোধন)আইনৰ বিৰোধিতা কৰিলেও বহু কেইগৰাকী অভিনেতা-অভিনেত্ৰীয়ে এই আইনৰ প্ৰতি সমৰ্থন ব্যক্ত কৰিছে।