অৱশেষত সফল হ’ল শিৱসাগৰ আৰক্ষী; নামঘৰৰ চুৰিৰ লগত জড়িত চোৰক গ্ৰেপ্তাৰ

শিৱসাগৰৰ পোন্ধৰটাৰো অধিক নামঘৰত চুৰি কাৰ্য কৰি শিৱসাগৰৰ আৰক্ষীৰ নিদ্ৰাহৰণ কৰা গভাইট চোৰ ৰিজু বুঢ়াগোহাঁইক আজি শিৱসাগৰ আৰক্ষীয়ে আটক কৰিবলৈ সক্ষম হয়।

এই গভাইট চোৰটোৰ ঘৰ গৌৰিসাগৰৰ সমীপৰ ন-কটানী গাঁৱত। আৰক্ষীয়ে এক গোপন সূত্ৰৰ পম খেদি গৌৰিসাগৰ তিনি আলিত গ্ৰেপ্তাৰ কৰে ৰিজু বুঢ়াগোহাঁইক।

আৰক্ষীৰ জেৰাত ৰিজুৱে শিৱসাগৰৰ বিভিন্ন নামঘৰত চুৰি কাৰ্য সংঘটিত কৰাৰ কথা স্বীকাৰ কৰে। ৰিজুৱে আৰক্ষীৰ আগত প্ৰকাশ কৰা মতে কোঁৱৰপুৰৰ কাঢ়িগাঁৱৰ এগৰাকীৰ মহিলাৰ ঘৰত চুৰি সামগ্ৰী সমূহ জমা কৰি ৰাখিছিল আৰু মহিলা গৰাকীয়ে সামগ্ৰী সমূহ বিক্ৰী কৰি চোৰ ৰিজুক তেওঁৰ অংশ প্ৰদান কৰিছিল।

উল্লেখ্য যে যোৱা এটা পষেকত এই গভাইট চোৰটোৱে মেটেকাৰ দুটা নামঘৰৰ লগতে শংকৰমন্দিৰ ৰোডৰ নামঘৰ, ফুকন নগৰ নামঘৰ, কোঁৱৰপুৰ, নকটানী অঞ্চলৰ প্ৰায় ১৫ টা নামঘৰত চুৰি কাৰ্য সংঘটিত কৰিছিল।

আৰক্ষীয়ে চুৰি সামগ্ৰী যেনে কাঁহী, বাতি, ভোৰতাল, চিলাই মেচিন আদি সামগ্ৰী মহিলাগৰাকীৰ ঘৰৰ পৰা উদ্ধাৰ কৰাৰ লগতে উদ্ধাৰ কৰা সামগ্ৰী সমূহ বহু কেইটা নামঘৰৰ মানুহ আহি তেওঁলোকৰ নিজা নামঘৰৰ সামগ্ৰী সমূহ চিনাক্ত কৰে।

উল্লেখ্য যে ধৃত চোৰ ৰিজুৱে ৰাইজৰ মাজত বিভ্ৰান্তি সৃষ্টি কৰিবলৈ নামঘৰত চুৰি কৰাৰ পাছত দানপাত্ৰ ভাঙি টকা লৈ যোৱাৰ লগতে নামঘৰৰ থাপনাও লুটিয়াই থৈ যায়।

শিৱসাগৰ জিলাৰ অতিৰিক্ত আৰক্ষী অধীক্ষক বলীন দেউৰী আৰু শিৱসাগৰ থানাৰ ভাৰপ্ৰাপ্ত বিষয়া প্ৰাণজিত লহকৰে বুধবাৰে ৰাতি এখন সংবাদমেল সম্বোধন কৰি এই সকলোবোৰ কথা জানিবলৈ দিয়ে।

ইফালে দোষী ব্যক্তিক উপযুক্ত শাস্তি প্ৰদান কৰিবলৈ আহ্বান জনাইছে শিৱসাগৰবাসী ৰাইজে।