ঐতিহাসিক ধোদৰ আলি: নিৰ্মাণৰ পিছতেই বখলা বখলে এৰাইছে পথ; ঠিকাদাৰ-অভিযন্তাৰ বিৰুদ্ধে থানাত গোচৰ

মুখ্যমন্ত্ৰী ডঃ হিমন্ত বিশ্ব শৰ্মাৰ হাতত থকা লোক নিৰ্মাণ বিভাগৰ কাম দেখিলে আপুনি সঁচাকৈয়ে আচৰিত হৈ পৰিব।

মুখ্যমন্ত্ৰী হৈয়ে ৰাতি ৰাতি নিৰ্মীয়মান পথ তদাৰক কৰি চমক সৃষ্টি কৰা ড০ হিমন্ত বিশ্ব শৰ্মাৰ হাতত থকা লোক নিৰ্মাণ বিভাগৰ কামৰ নমুনা দেখি এতিয়া সকলোৰে  চকু মুকলি হৈছে।

নিৰ্মাণৰ কেইদিনমানৰ পিছতেই বখলা বখলে এৰাইছে আহোম যুগৰ ঐতিহাসিক ধোদৰ আলিৰ।

অভিযন্তা-ঠিকাদআৰে মিলি অতি নিম্নমানৰ কাম কৰি কোটি টকা আত্মসাৎ কৰাৰ অভিযোগ তুলিছে বিভিন্ন দল সংগঠনে।

লগতে পঢ়ক: বনভোজলৈ যাবলৈ অনুমতি নিদিয়াৰ বাবেই মহানগৰীত ১৯বছৰীয়া যুৱতীৰ আত্মহত্যা!

উল্লেখ্য যে  শিৱসাগৰৰ আমগুৰিৰ জাঁজীৰ পৰা চটাইচিগালৈকে প্ৰায় ৯ কিলোমিটাৰ পথ নিৰ্মাণৰ বাবে লোক নিৰ্মাণ বিভাগে ৮ কোটি টকা ধাৰ্য কৰিছিল। পথটো কিছু অংশ বেয়া আছিল যদিও আন বহু অংশ ভাল হৈয়েই আছিল।

বেয়া হৈ থকা অংশত অতি নিম্নমানদণ্ডৰ কাম কৰি অভিযন্তা আৰু ঠিকাদাৰে  ৮ কোটি টকা শাৰধ কৰাৰ পৰিকল্পনা কৰা বুলি অভিযোগ কৰিছে ছাত্ৰ মুক্তি সংগ্ৰাম সমিতিয়ে।

পথটো বিসংগতিপূৰ্ণ আৰু নিম্নমানদণ্ডৰে নিৰ্মাণ কৰা বুলি আমগুৰিৰ লোকনিৰ্মাণ বিভাগত বাৰে বাৰে অভিযোগ দিয়াৰ পাছতো কোনো গুৰুত্ব নিদিয়াৰ অভিযোগ কৰে ছাত্ৰ মুক্তি সংগ্ৰাম সমিতিয়ে।

সেয়ে ছাত্ৰ মুক্তি সংগ্ৰাম সমিতিৰ অধীনৰ আমগুৰি আঞ্চলিক সমিতিয়ে যোৱা ৮ জানুৱাৰীত লোক নিৰ্মাণ বিভাগৰ কণিষ্ঠ অভিযন্তা মোহন বড়া আৰু ঠিকাদাৰ ৰিন্টু বৰগোঁহাইৰ বিৰুদ্ধে আমগুৰি আৰক্ষী থানাত এজাহাৰ দাখিল কৰে।

লগতে পঢ়ক:Transplant of pig heart into human body চিকিৎসা বিজ্ঞানৰ চমৎকাৰ! মানৱ দেহত গাহৰিৰ কলিজা সফলতাৰে প্ৰতিষ্ঠাপন; গঢ়িলে ইতিহাস

সংগঠনটোৱে ১০ জানুৱাৰীত শিৱসাগৰ জিলা উপায়ুক্তক স্মাৰক পত্ৰ প্ৰদান কৰি নিম্নমানৰ আৰু বিসংগতিপূৰ্ণভাৱে নিৰ্মাণ কৰা ঐতিহাসিক ধোদৰ আলি পুনৰ নিৰ্মাণৰ লগতে অতি শীঘ্ৰে ঠিকাদাৰ আৰু অভিযন্তাৰ বিৰুদ্ধে বিহিত ব্যৱস্থা গ্ৰহণৰ দাবী জনায়।