সোণভদ্ৰাৰ শিল কুৱেৰীত ভয়াবহ দুৰ্ঘটনা! ভগ্নাৱশেষৰ তলত পোত গ’ল বহু শ্ৰমিক

উত্তৰ প্ৰদেশৰ সোণভদ্ৰা জিলাৰ এটা শিল কুৱেৰীত ভয়ংকৰ দুৰ্ঘটনা সংঘটিত হৈছে। কুৱেৰীৰ এটা বৃহৎ অংশ খহি পৰাত বহু শ্ৰমিক শিলৰ ভগ্নাৱশেষৰ তলত পোত যায়। প্ৰাপ্ত তথ্য অনুসৰি, দুৰ্ঘটনাৰ সময়ত প্ৰায় ১৫-১৮ জন শ্ৰমিক কুৱেৰীৰ ভিতৰত কাম কৰি আছিল। বিভাগীয় সূত্ৰই জনোৱা মতে, এতিয়ালৈকে ঘটনাস্থলীৰ পৰা এটা মৃতদেহ উদ্ধাৰ কৰা হৈছে আৰু তলত কিমানজন শ্ৰমিক আবদ্ধ হৈ আছে, সেই সংখ্যা নিশ্চিত নহয়। আবদ্ধ শ্ৰমিকসকলক উদ্ধাৰ কৰিবলৈ এনডিআৰএফ আৰু এছডিআৰএফে অভিযান অব্যাহত ৰাখিছে।

শনিবাৰে বিয়লি প্ৰায় ৩ বজাত ওব্ৰা আৰক্ষী থানাৰ অন্তৰ্গত বিলি মাৰ্কুণ্ডি খনন এলেকাৰ ৰাশপাহাৰী পাহাৰৰ কৃষ্ণ খনিত এই দুৰ্ঘটনা সংঘটিত হয়। প্ৰায় ৪০০ ফুট ওখ পাহাৰটোৰ তলত শ্ৰমিকসকল কাম কৰি থকাৰ সময়তে ওপৰৰ পৰা শিলৰ এটা বৃহৎ অংশ ভাঙি তললৈ খহি পৰে। শ্ৰমিকসকলে কম্প্ৰেছাৰ মেচিনেৰে শিলত ফুটা কৰি থকাৰ সময়তে এই দুৰ্ঘটনাটো সংঘটিত হয়।

ঘটনাস্থলীৰ কাষেৰে পাৰ হৈ যাওঁতে এই দৃশ্য প্ৰত্যক্ষ কৰি এজন ব্যক্তিয়ে তৎক্ষণাৎ আৰক্ষীক খবৰ দিয়ে। কিছুক্ষণৰ ভিতৰতে আৰক্ষী, জিলা প্ৰশাসন আৰু শ্ৰমিকসকলৰ পৰিয়ালৰ লোকসকল ঘটনাস্থলীত উপস্থিত হয়।

জিলা দণ্ডাধীশ বি এন সিঙে কয়, “কুৱেৰীৰ ভিতৰত এখন দেৱাল ভাঙি পৰাত বহু শ্ৰমিক সমাধিস্থ হৈছে। ঠিক কিমানজন লোক আবদ্ধ হৈ আছে, সেইটো এতিয়াও নিশ্চিত হোৱা নাই। উদ্ধাৰ অভিযান জোৰদাৰভাৱে চলি আছে।”

অঞ্চলৰ বিধায়ক আৰু উত্তৰ প্ৰদেশৰ সমাজ কল্যাণ ৰাজ্যিক মন্ত্ৰী সঞ্জীৱ কুমাৰ গণ্ডে দেওবাৰে ঘটনাস্থল পৰিদৰ্শন কৰি জানায়, “প্ৰাথমিক তথ্যৰ ভিত্তিত ধাৰণা কৰা হৈছে যে প্ৰায় এক ডজন শ্ৰমিক এই ধ্বংসাৱশেষৰ তলত আবদ্ধ হৈ আছে।

তেওঁ যোগ কৰে, “জিলা দণ্ডাধীশ, আৰক্ষী অধীক্ষক আৰু সকলো বিভাগীয় বিষয়াই উদ্ধাৰ অভিযান তদাৰক কৰি আছে। আবদ্ধ শ্ৰমিকক সুৰক্ষিতভাৱে উদ্ধাৰ কৰিবলৈ সকলো প্ৰচেষ্টা অব্যাহত আছে।”