চলিত বছৰৰ আই পি এল অনুষ্ঠিত হোৱাৰ সম্ভাৱনা কিমান? জনালে সৌৰভ গাংগুলীয়ে

মহামাৰী ক’ৰ’না ভাইৰাছৰ সংহাৰী ৰূপৰ প্ৰতি লক্ষ্য ৰাখি চৰকাৰে জাৰি কৰা লকডাউনৰ বাবে অনিৰ্দিষ্ট কাললৈ স্থগিত কৰা হৈছিল বিশ্বৰ প্ৰভাৱশালী ক্ৰিকেট লীগ আই পি এল।

এতিয়া চতুৰ্থ পৰ্যায়ৰ লকডাউন অন্ত পৰাত অৰ্থাৎ ১ জুনৰ পৰা কেন্দ্ৰীয় চৰকাৰে শিথিলতা প্ৰদান কৰা বাবে পুনৰ চৰ্চিত হৈছে আই পি এল অনুষ্ঠিত কৰাৰ প্ৰসংগ।

২০২০ বৰ্ষৰ আই পি এল অনুষ্ঠিত হ’ব নে নহয় সেই বিষয়ে দেশৰ ক্ৰিকেট অনুৰাগী সকলৰ মাজত বিভিন্ন প্ৰশ্নৰ অৱতাৰণা হৈ থকাৰ সময়তে আহিছে বি চি চি আইৰ সভাপতি সৌৰভ গাংগুলীৰ মন্তব্য।

সূত্ৰৰ পৰা পোৱা তথ্য অনুসৰি গাংগুলীয়ে আই পি এল সন্দৰ্ভত কয় যে চলিত বৰ্ষৰ আই পি এল আয়োজন কৰা হ’লেও স্পষ্ট নহয় যে ইয়াৰ স্থান কেনেদৰে নিৰ্ধাৰণ কৰা যায়।

তেওঁ লগতে কয় যে, এই সন্দৰ্ভত চিন্তা-চৰ্চা কৰিব লাগিব।

ইফালে ভাৰতৰ পৰিবেশ যদি সুৰক্ষিত আৰু সুস্থিৰ হয় তেন্তে ভাৰতেই আই পি এলৰ আয়োজন কৰিব পাৰিব বুলিও গাংগুলীয়ে মন্তব্য কৰে।

আই পি এল সন্দৰ্ভত এতিয়াও কোনো সিদ্ধান্ত হোৱা নাই আৰু এই সন্দৰ্ভত আলোচনাৰ পিছতহে পৰৱৰ্তী সিদ্ধান্ত লোৱা হ’ব বুলি অধ্যক্ষ গৰাকীয়ে কয়।

ভাৰতীয় ক্ৰিকেট দলৰ প্ৰাক্তন অধিনায়ক তথা বৰ্তমানৰ বি চি চি আইৰ অধ্যক্ষ গৰাকীয়ে লগতে কয় যে সম্প্ৰতি আই পি এলতকৈ সাধাৰণ লোকৰ সুৰক্ষা বেছি প্ৰয়োজনীয়।