ৰজনীকান্তৰ কন্যা ঐশ্বৰ্যাৰ সৈতে ১৮ বছৰীয়া বৈবাহিক সম্পৰ্কৰ ইতি পেলালে ছুপাৰষ্টাৰ ধনুশে

সোমবাৰে নিশা সকলোৱে আচৰিত কৰি বিবাহ বিচ্ছেদৰ কথা ঘোষণা কৰিলে দক্ষিণৰ ছুপাৰষ্টাৰ ধনুশে। তাৰকা অভিনেতাগৰাকীয়ে জানিবলৈ দিয়ে যে তেওঁ আৰু তেওঁৰ পত্নী ঐশ্বৰ্যাই ১৮বছৰীয়া বৈবাহিক সম্পৰ্কৰ ইতি পেলোৱাৰ সিদ্ধান্ত লৈছে।

ধনুশৰ এই ঘোষণাৰ পাছতে দক্ষিণৰ ছবি জগতত স্বাভাৱিকতে তীব্ৰ আলোড়নৰ সৃষ্টি হৈছে। কিছুদিন পূৰ্ব দক্ষিণৰ ছবিৰ আন এক জনপ্ৰিয় তাৰকা যুটী নাগা চৈতন্য আৰু সামান্থাৰ বিচ্ছেদ ঘটিছে।

ধনুশে টুইটাৰত লিখিছে,’’বন্ধু হিচাপে, পিতৃ-মাতৃ হিচাপে ১৮ বছৰৰ দাম্পত্য জীৱন। এই যাত্ৰা আছিল মানুহ হিচাপে গঢ়ি উঠাৰ, এজনে আনজনক বুজি উঠাৰ, অনুসৰণ কৰাৰ। আজি আমি এনেকুৱা এটা সিদ্ধান্তত আহি উপনীত হৈছো য’ত আমি বুজিব পাৰিছো এইবাৰ আমাৰ যাত্ৰা পথ সলনি হোৱাটোৱে ভাল। মই আৰু ঐশ্বৰ্যাই পৃথক হোৱাৰ সিদ্ধান্ত লৈছো। এতিয়া নিজকে নিজে বুজাৰ সময়।‘’

ধনুশে লগতে লিখিছে,’’ অহা দিনবোৰত বৰঞ্চ ইজনে সিজনক বুজাৰ বাবে আৰু অলপ সময় ল’ব। সকলোৰে ওচৰত অনুৰোধ অনুগ্ৰহ কৰি আমাৰ সিদ্ধান্তক সন্মান জনাব আৰু আমাৰ ব্যক্তিগত জীৱনৰ গোপনীয়তা বজাই ৰাখিবলৈ দিব।‘’

ইপিনে, ঐশ্বৰ্যায়ো একেই ধৰণে তেওঁৰ ছচিয়েল মিডিয়া একাউন্টত আপডেট দিছে।  

দক্ষিণৰ ছবি জগতত বিতৰ্কহীন আদৰ্শ দম্পতি হিচাপে পৰিচিত ধনুশ-ঐশ্বৰ্যাৰ বিচ্ছেদৰ বাতৰিয়ে তেওঁলোকৰ অনুৰাগীসকলক ব্যথিত কৰি তুলিছে। কিন্তু তাৰ পাছতো কিয় ঘটিল বিচ্ছেদ? এই প্ৰশ্নৰ উত্তৰ পাবলৈ হয়তো আৰু সময় লাগিব।

🙏🙏🙏🙏🙏 pic.twitter.com/hAPu2aPp4n

— Dhanush (@dhanushkraja) January 17, 2022

উল্লেখ্য যে ২০০৪ চনত ছুপাৰষ্টাৰ ৰজনীকান্তৰ কন্যা ঐশ্বৰ্যাৰ সৈতে বিবাহপাশত আৱদ্ধ হৈছিল ধনুশ। তেওঁলোকৰ দুটি পুত্ৰ সন্তান যাত্ৰা আৰু লিংগা। ঐশ্বৰ্যা ‘ভাই ৰাজা ভাই’, ‘৩’ৰ দৰে ছবিৰ পৰিচালক আছিল। আনহাতে, বিগত ডেৰ দশক ধৰি দক্ষিণৰ ছবি জগতত ছুপাৰষ্টাৰ হিচাপে নিজৰ স্থান ধৰি ৰাখিছে ধনুশে।