ৰাজনৈতিক আৰু বিতৰ্কিত বিষয়ত সভা-সমিতি পাতিলে ল’ব লাগিব বিশেষ অনুমতি, নিৰ্দেশ IIT বম্বেৰ
এইবাৰ ছাত্ৰ-ছাত্ৰীৰ বাবে জাননীযোগে এক নিৰ্দেশ জাৰি কৰিছে IIT বম্বেই। আই আই টি-বি কৰ্তৃপক্ষই কয় যে প্ৰতিষ্ঠানটোৰ ভিতৰত যিকোনো অনুষ্ঠানৰ বাবে বাহিৰৰ পৰা ‘মুখ্য অতিথি’ অনাৰ পূৰ্বে ‘বিশেষ অনুমতি’ ল’ব লাগিব।
ইজৰাইল আৰু পেলেষ্টাইন সংঘাত সম্পৰ্কে প্ৰতিষ্ঠানটোত আয়োজন কৰা এক অনুষ্ঠানত মুখ্য অতিথি নিমন্ত্ৰণক কেন্দ্ৰ কৰি সৃষ্টি হোৱা বিতৰ্কৰ পিছতেই এই নিৰ্দেশ জাৰি কৰিছে কৰ্তৃপক্ষই।
সৰ্বভাৰতীয় প্ৰতিষ্ঠানটোৰ মানৱীয় আৰু সমাজবিজ্ঞান বিভাগে আয়োজন কৰা ইজৰাইল-পেলেষ্টাইন সম্পৰ্কীয় আলোচনা চক্ৰৰ বাবে বিগত দুসপ্তাহ ধৰি সংবাদ মাধ্যমৰ শিৰোনাম দখল কৰি আহিছে।
সেই আলোচনা চক্ৰৰ ‘মূল বক্তা’গৰাকীয়ে পেলেষ্টাইনৰ ওপৰত ইজৰাইলৰ আক্ৰমণক তীব্ৰ গৰিহণা দিছিল। কেম্পাছত এই ঘটনাক লৈ ‘হিন্দুত্ববাদী’ ছাত্ৰ-ছাত্ৰীয়ে প্ৰতিবাদী আন্দোলন আৰম্ভ কৰে।
বিভাগটোৰ মুৰব্বী অধ্যাপিকা শৰ্মিষ্ঠা সাহাৰৰ পদত্যাগৰ দাবী জনাইছে হিন্দুত্ববাদী ছাত্ৰ-ছাত্ৰীসকলে । আনকি আন্দোলনকাৰীয়ে তেওঁক হত্যা কৰাৰ ভাবুকিও প্ৰদান কৰিছে।
ইয়াৰ পিছত প্ৰতিষ্ঠানটোৰ পঞ্জীয়কেও এই আন্দোলনক সমৰ্থন কৰি এক বিবৃতি প্ৰকাশ কৰি কয় যে কেম্পাছত ৰাজনৈতিক বিষয়ত কোনো আলোচনা চক্ৰ, বক্তৃতা বা বিতৰ্কৰ আয়োজন কৰিব নোৱাৰিব। কেৱল পঠন সম্পৰ্কীয় বিষয়ৰ ওপৰত আলোচনা চক্ৰ বা বিতৰ্কৰ আয়োজন কৰিব পাৰিব।
ইয়াৰ উপৰিও যিকোনো ধৰণৰ প্ৰতিবাদী সভা, আন্দোলন, বিক্ষোভৰ বাবেও ছাত্ৰ-ছাত্ৰী আৰু শিক্ষকৰ সংগঠনসমূহে আৰক্ষীৰ অনুমতি ল’ব লাগিব।