ধোঁৱাচাঙত ‘বেটী বচাও, বেটী পঢ়াও’: ভূপালত পাঁচ বৰ্ষীয় বিশেষভাৱে সক্ষম দলিত শিশুক ধৰ্ষণ চুবুৰীয়াৰ

দেশত উদ্বেগজনকভাৱে বৃদ্ধি পাইছে ধৰ্ষণৰ দৰে নিকৃষ্ট ঘটনা। শিশুৰ পৰা বৃদ্ধালৈকে দেশত মহিলাৰ ওপৰত চলা এনে বৰ্বৰতাই উদঙাই দিছে দেশত নাৰী সুৰক্ষাৰ প্ৰকৃত ছবি। ধোঁৱাচাঙত প্ৰধানমন্ত্ৰী মোদীৰ ‘বেটী বচাও, বেটী পঢ়াও’ শ্ল’গান। এইবাৰ মধ্যপ্ৰদেশৰ ৰাজধানী ভূপালত সংঘটিত এক ধৰ্ষণকাণ্ডই পুনৰবাৰ এই শ্ল’গানৰ ব্যৰ্থতাক সমুখলৈ আনিছে।

ভূপালৰ কোলাৰ অঞ্চলত চুবুৰীয়া দুৰ্বৃত্তৰ কামনাৰ বলি হৈছে এটি পাঁচ বছৰীয়া মূক-বধিৰ দলিত কন্যা শিশু। ঘটনা সন্দৰ্ভত আৰক্ষীয়ে জানিবলৈ দিয়া মতে, ধৰ্ষণৰ বলি হোৱা শিশুটিৰ পিতৃ-মাতৃক এগৰাকী চুবুৰীয়াই অভিযুক্ত ব্যক্তিগৰাকীৰ ঘৰৰ পৰা তেওঁলোকৰ সন্তানৰ কান্দোন শুনিবলৈ পাইছে বুলি অৱগত কৰে।

শিশুটিৰ মাতৃ তৎক্ষণাৎ ব্যক্তিগৰাকীৰ ঘৰলৈ দৌৰি যায় আৰু লম্পট ব্যক্তিগৰাকীয়ে শিশুটিক ধৰ্ষণ কৰা দেখিবলৈ পায়। এই বৰ্বৰ কাণ্ড দেখাৰ পাছতে আৰক্ষীক লগে লগে খবৰ দিয়া হয়। অভিযুক্ত ব্যক্তিগৰাকীয়ে খেলাৰ অজুহাত দেখুৱাই শিশুটিক তেওঁৰ ঘৰলৈ লৈ গৈছিল বুলি শিশুটিয়ে মাক-দেউতাকক কয়।

পিতৃ-মাতৃৰ অভিযোগৰ পাছতে কোলাৰ আৰক্ষীয়ে ৫৬ বছৰীয়া অভিযুক্ত ব্যক্তিগৰাকীক গ্ৰেপ্তাৰ কৰিছে। ধৃত ব্যক্তিগৰাকীৰ স্বাস্থ্য পৰীক্ষাত এই নিকৃষ্ট কাণ্ড সংঘটিত কৰাৰ সময়ত সুৰাপান কৰি থকাৰ প্ৰমাণ পোৱা গৈছে বুলি স্থানীয় আৰক্ষী বিষয়া এগৰাকীয়ে জানিবলৈ দিছে।

অভিযুক্তৰ বিৰুদ্ধে ভাৰতীয় দণ্ডবিধিৰ প্ৰাসংগিক ধাৰাৰ লগতে যৌন অপৰাধৰ পৰা শিশুৰ সুৰক্ষা আইন (POCSO), অনুসূচীত জাতি আৰু অনুসূচীত জনজাতি (অত্যাচাৰ প্ৰতিৰোধ) আইনৰ প্ৰাসংগিক ধাৰাৰ অধীনত গোচৰ পঞ্জীয়ন কৰা হৈছে আৰু তেওঁক ন্যায়িক জিম্মালৈ প্ৰেৰণ কৰা হৈছে বুলি বিষয়াগৰাকীয়ে লগতে কয়।

ইফালে ৰাজ্যখনৰ শাসনাধিষ্ঠ বিজেপি চৰকাৰে শেহতীয়াকৈ অপৰাধীৰ বিৰুদ্ধে কঠিন বাৰ্তা প্ৰেৰণ কৰিবলৈ জঘন্য অপৰাধৰ অপৰাধীসকলৰ অবৈধ নিৰ্মাণ ধ্বংস কৰি অহাৰ দৰেই এই ঘটনাৰ অভিযুক্ত গৰাকীয়ে অবৈধভাৱে নিৰ্মাণ কৰা বাসগৃহ ভাঙি পেলায় বুলি স্থানীয় কৰ্তৃপক্ষই জানিবলৈ দিছে।