দৌৰ ৰাণী হিমাৰ পৰিয়াললৈ বিনামূলীয়া চিকিৎসা সুবিধা আৰু স্বাস্থ্য বীমা
দৌৰ ৰাণী হিমা দাসৰ লগতে তেওঁৰ পৰিয়ালক ভাৰতৰ যিকোনো ঠাইতে বিনামূলীয়া চিকিৎসা সুবিধা আগবঢ়াব গুৱাহাটীস্থিত হায়াট হস্পিতালে। হিমা দাসক অভিনন্দন জনোৱাৰ উদ্দেশ্যে আজি গুৱাহাটীৰ লতাশিল খেলপথাৰত আছুয়ে আয়োজন কৰা এক অনুষ্ঠানত চিকিৎসালয়খনে এই ঘোষণা কৰে।
তদুপৰি একে অনুষ্ঠানতে নেমকেয়াৰ হস্তপিতালেও দৌৰবিদ গৰাকীৰ গোটেই পৰিয়ালটোলৈ ৫ লাখ টকাৰ স্বাস্থ্য বীমা আগবঢ়োৱাৰ কথা ঘোষণা কৰে।
আজিৰ উক্ত অভিনন্দন অনুষ্ঠানত কেইবাখনো মহাবিদ্যালয়, ক্ৰীড়া ক্লাবকে ধৰি প্ৰায় ১৬০টা বিভিন্ন সংগঠনে হিমাক সম্বৰ্ধনা জনায়।
আছুয়ে হিমাক স্থপতি বীৰেন সিংহই সাজি উলিওৱা এটি স্মাৰক, এখন প্ৰসস্তিপত্ৰ আৰু এখন ফুলাম গামোচাৰে সম্বৰ্ধনা জ্ঞাপন কৰে।
অনুষ্ঠানত ভাষণ প্ৰদান কৰি আছুৰ উপদেষ্টা ড০ সমুজ্জল কুমাৰ ভট্টচাৰ্যই কয়, ‘আছুয়ে কেৱল আন্দোলন কৰে বুলিহে আমাৰ এটা ইমেজ আছে। হয়, অসমৰ মানুহৰ বৃহত্তৰ স্বাৰ্থত আমি আন্দোলন কৰোঁ। এতিয়া আমি হিমাৰ দৰে প্ৰতিভাক উলিয়াই অনাৰ আন্দোলনত নামিছো।‘
তেওঁ লগতে কয়, ‘আমি ৰাজ্যৰ জনসাধাৰণৰ মাজলৈ এটা বাৰ্তা প্ৰেৰণ কৰি খুজিছো- মোৰ কাম মোৰ দেশৰ কাম আৰু মোৰ গৌৰৱ মোৰ দেশৰ গৌৰৱ।‘
হিমাক উৎকৃষ্ট প্ৰক্ষিশণৰ প্ৰদানৰ বাবে ৰাজ্য চৰকাৰক প্ৰৰ্যাপ্ত আন্তঃগাঠনি গঢ়ি তুলিবলৈ আহ্বান জনাই ভট্টচাৰ্যই হিমাক সোণৰ পদকৰ বাবে হেঁচা নিদিবলৈ সকলো লোকলৈ আহ্বান জনায়।
ইয়াৰ উপৰি আছুৰ সাধাৰণ সম্পাদক লুৰিণজ্যোতি গগৈয়ে ৰাজ্য চৰকাৰক শীঘ্ৰে এখন সৰ্বাত্মক ক্ৰীড়া নীতি প্ৰস্তুত কৰিবলৈ আহ্বান জনায়।
আজিৰ অনুষ্ঠানত হিমাৰ পৰিয়ালৰ লগতে প্ৰশিক্ষক নিপন দাস আৰু নৱজিত মালাকাৰ উপস্থিত থাকে।