ঝাৰখণ্ডৰ ডুমকাত মাওবাদীৰ আক্ৰমণত নিহত অসমৰ এছএছবি জোৱান

ঝাৰখণ্ডৰ ডুমকা জিলাৰ কাথালিয়া গাঁৱত দেওবাৰে সন্দেহযুক্ত মাওবাদীৰ আক্ৰমণত কেন্দ্ৰীয় আৰক্ষী বাহিনীৰ এগৰাকী জোৱান নিহত হোৱাৰ উপৰি আন চাৰিগৰাকী আহত হৈছে। ক্ষন্তেক আগতে হিন্দুস্তান টাইমছে এই বাতৰি প্ৰকাশ কৰিছে।

এগৰাকী বিষয়াই জানিবলৈ দিয়ে যে মাওবাদীয়ে সশস্ত্ৰ সীমা বল (এছএছবি) আৰু ৰাজ্যিক আৰক্ষীৰ এটা যৌথ অভিযানকাৰী দলৰ ওপৰত আক্ৰমণ চলায়। এই ঘটনাত কেইজনমান মাওবাদীও নিহত হোৱাৰ অনুমান কৰা হৈছে যদিও প্ৰকৃত হতাহতৰ সংখ্যা জানিব পৰা হোৱা নাই আৰু অভিযান এতিয়াও অব্যাহত আছে।

বাতৰি অনুসৰি, এছএছবিৰ কামাণ্ডেন্ট সঞ্জয় গুপ্তাই জানিবলৈ দিয়া মতে নিহত জোৱানজনক নিৰজ চেত্ৰী বুলি চিনাক্ত কৰা হৈছে আৰু তেওঁৰ ঘৰ অসমত। অৱশ্যে, এই সম্পৰ্কত সৱিশেষ এতিয়াও জানিব পৰা হোৱা নাই।

আনহাতে, এই আক্ৰমণৰ ঘটনাত ৰাজেশ ৰাই নামৰ আন এজন কনিষ্টবল গুৰুতৰভাৱে আহত হৈছে আৰু চিকিৎসাৰ বাবে বিমানেৰে তেওঁক ৰাঁচীলৈ প্ৰেৰণ কৰা হৈছে। তদুপৰি, আহত আন তিনিজন জোৱানক ডুমকাৰ এখন চৰকাৰী হাস্পাতলত ভৰ্তি কৰি চিকিৎসা প্ৰদান কৰা হৈছে।

উল্লেখযোগ্য যে যোৱা ২৮ মে’ত ঝাৰখণ্ডৰে খাৰছাৱন জিলাৰ ছেৰাইকেলাত মাওবাদীয়ে এলানি বিস্ফোৰণ ঘটাইছিল য’ত ২৬জন সুৰক্ষা বাহিনীৰ লোক আহত হৈছিল।