শচীনক কেইবাবাৰো ভুল সিদ্ধান্তৰে আউট দিছিল বুলি মানি ল’লে ষ্টিভ বাকনাৰে

আন্তঃৰাষ্ট্ৰীয় ক্ৰিকেট ইতিহাসৰ সৰ্বশ্ৰেষ্ঠ আম্পায়াৰৰ তালিকাত ষ্টিভ বাকনাৰৰ নাম লিপিবদ্ধ হৈ থাকিলেও তেওঁক কিন্তু আজিও পচন্দ নকৰে ভাৰতীয় অনুৰাগীয়ে।

কিয়নো বাকনাৰে কেইবাবাৰো শচীন টেণ্ডুলকাৰক ভুল সিদ্ধান্তৰে আউট দিছিল আৰু যাৰ বাবে তেওঁ আজিও ভাৰতীয় অনুৰাগীৰ প্ৰিয় হৈ উঠিব নোৱাৰিলে।

বহু গুৰুত্বপূৰ্ণ মেচত আম্পায়াৰিং কৰা বাকনাৰে কিন্তু এতিয়া নিজৰ ভুলৰ কথা স্বীকাৰ কৰিছে। তেওঁ আম্পায়াৰিং কেৰিয়াৰত শচীন টেণ্ডুলকাৰক দুবাৰ ভুল সিদ্ধান্তৰে আউট দিছিল বুলি মন্তব্য কৰিছে।

আম্পায়াৰ হিচাপে অৱসৰ লোৱাৰ ১১ বছৰ পিছত বাৰবাডোছৰ এটা ৰেডিঅ’ সাক্ষাৎকাৰত বাকনাৰে কয়, ‍‘মই শচীনক দুবাৰ ভুল সিদ্ধান্তৰে আউট দিছিলো। কোনো আম্পায়াৰে ভুল কাম কৰিব বিচাৰে বুলি মই নাভাবো‍‘।

তেওঁ লগতে কয়, ‍‘ভুল মানুহৰেই হয়। ২০০৩ত মই এবাৰ গেলেস্পিৰ বলত শচীনক এল বি ডব্লিউ আউট দিছিলো, যিটো সিদ্ধান্ত ভুল আছিল। আৰু দ্বিতীয়বাৰ ভুল হৈছিল পাকিস্তানৰ বিৰুদ্ধে ২০০৫ত কলকাতাত খেলা টেষ্ট মেচখনত‍’।

কলকাতা টেষ্টত কিয় এনে ভুল সিদ্ধান্ত দিব লগীয়া হ’ল সেই সন্দৰ্ভত তেওঁ কয়, ‍‘মেচ আছিল ইডেন গাৰ্ডেনত। তাত ভাৰতে বেট ধৰি থাকিলে আপুনি একো শুনা নাপায়, কাৰণ এক লাখৰো অধিক লোকে চিঞৰি থাকে। সেয়ে মোৰ ভুল হ’ল’।

উল্লেখ্য যে, ষ্টিভ বাকনাৰে কৰা এই ভুল দুটাৰ বাবে আজিও তেওঁ আক্ষেপ কৰে বুলি মন্তব্য কৰে।