SIR-ক লৈ একাধিক গোচৰ : নিৰ্বাচন আয়োগক মত প্ৰকাশ কৰিবলৈ জাননী উচ্চতম ন্যায়ালয়ৰ

কেৰালা, উত্তৰ প্ৰদেশকে ধৰি অন্য ৰাজ্যসমূহত SIR ক প্ৰত্যাহ্বান জনাই দাখিল কৰা কেইবাটাও নতুন গোচৰ সম্পৰ্কে নিৰ্বাচন আয়োগৰ বক্তব্য জানিবলৈ উচ্চতম ন্যায়ালয়ে জাননী জাৰি কৰিছে। দেশৰ ১২ খন ৰাজ্য আৰু কেন্দ্ৰীয় শাসিত অঞ্চলত SIR প্ৰক্ৰিয়া আৰম্ভ হৈছে।

ইতিমধ্যে বংগ, তামিলনাডুৰ দৰে ৰাজ্য আৰু ৰাজনৈতিক দলসমূহে এই প্ৰক্ৰিয়াৰ বিৰোধিতা কৰি শীৰ্ষ আদালতৰ কাষ চাপিছে। পিছত কেৰালা, সেই ৰাজ্যৰ চিপিএম-সহ আন কেইবাটাও পক্ষই আদালতত আবেদন দাখিল কৰিছে।

শুকুৰবাৰে ন্যায়াধীশ সূৰ্য কান্ত, ন্যায়াধীশ এছ. ভি. এন. ভাট্টি আৰু ন্যায়াধীশ জয়মাল্য বাগচীৰ বিচাৰপীঠত এই গোচৰটোৰ শুনানি আছিল। মূলতঃ SIR-ৰ প্ৰক্ৰিয়া আৰু সময়ক লৈ আপত্তি জনাই নতুন আবেদনসমূহ দাখিল কৰা হৈছিল। সেই আবেদনসমূহৰ ভিত্তিত এইবাৰ নিৰ্বাচন আয়োগৰ মতামত জানিবলৈ বিচাৰিছে শীৰ্ষ আদালতে।

আজি আদালতখনে এই গোচৰসমূহৰ শুনানি গ্ৰহণ কৰিবলৈ সন্মতি জনাই ৰাষ্ট্ৰীয় নিৰ্বাচন আয়োগলৈ বক্তব্য জানিবলৈ জাননী জাৰি কৰে। গোচৰটোৰ পৰৱৰ্তী শুনানি ২৬ নৱেম্বৰত হ’ব।

অৱশ্যে কেৱল কেৰালা চৰকাৰেই নহয়, উত্তৰ প্ৰদেশৰ বাৰাবাঁকীৰ কংগ্ৰেছ সাংসদ তনুজ পুনিয়াইও SIR স্থগিত ৰখাৰ দাবীত উচ্চতম ন্যায়ালয়ত গোচৰ দাখিল কৰিছে। সেই গোচৰটোতো ন্যায়াধীশসকলে নিৰ্বাচন আয়োগৰ পৰা উত্তৰ বিচাৰিছে। কিন্তু এই গোচৰটোৰ শুনানিৰ তাৰিখ এতিয়ালৈকে ঠিক হোৱা নাই।