অনলাইন CBSE, CISCE ব’ৰ্ড পৰীক্ষা অনুষ্ঠিত কৰিবলৈ কৰা আবেদন খাৰিজ উচ্চতম ন্যায়ালয়ৰ

ভাৰতৰ উচ্চতম ন্যায়ালয়ে আজি কেন্দ্ৰীয় মাধ্যমিক শিক্ষা পৰিষদ (CBSE) আৰু ভাৰতীয় বিদ্যালয় প্ৰমাণপত্ৰ পৰীক্ষা পৰিষদৰ (CISCE) দ্বাৰা পৰিচালিত ব’ৰ্ড পৰীক্ষাৰ পদ্ধতি পৰিৱৰ্তন কৰিবলৈ অস্বীকাৰ কৰে। উচ্চতম ন্যায়ালয়ৰ ন্যায়াধীশ এ এম খানউইলকাৰ আৰু ন্যায়াধীশ চিটি ৰবিকুমাৰে ছয় ছাত্ৰই অনলাইন আৰু অফলাইন পৰীক্ষাৰ হাইব্ৰিড পদ্ধতিৰ বাবে দাখিল কৰা আবেদন খাৰিজ কৰে।

চিবিএছই ৰ ম্যাদ ১ পৰীক্ষা ইতিমধ্যে আৰম্ভ হৈছে আৰু অহা সপ্তাহত চিআইএছচিই পৰীক্ষা আৰম্ভ হ’ব।

উচ্চতম ন্যায়ালয়ৰ বিচাৰপীঠে শুনানিৰ সময়ত যথেষ্ট কঠোৰ মন্তব্য আগবঢ়ায় আৰু শেষ মুহূৰ্তত পৰীক্ষাৰ ক্ষেত্ৰত সৃষ্টি কৰা বাধাৰ বিৰুদ্ধে আবেদনকাৰীসকলক সতৰ্ক কৰি দিয়ে।

“শিক্ষা ব্যৱস্থাৰ সৈতে খেলিমেলি নকৰিব। কৰ্তৃপক্ষক তেওঁলোকৰ কাম ভালদৰে কৰিবলৈ দিয়ক। এতিয়া বহুত পলম হৈছে। এই শেষ মুহূৰ্তত প্ৰৰীক্ষাৰ ক্ষেত্ৰত কঠিনতাৰ সৃষ্টি কৰা উচিত নহয়।”

লগতে বিচাৰপীঠে কয় যে শিক্ষাৰ্থীসকলৰ সুৰক্ষা নিশ্চিত কৰাৰ বাবে চৰকাৰে ক’ভিদ সাৱধানতামূলক ব্যৱস্থা গ্ৰহণ কৰিছে।

“পৰীক্ষা কেন্দ্ৰসমূহ ৬,৫০০ ৰ পৰা ১৫,০০০ লৈ বৃদ্ধি পাইছে। পৰীক্ষাৰ সময় ৩ ঘণ্টাৰ পৰা ১.৫ ঘণ্টালৈ হ্ৰাস কৰা হৈছে। আশা কৰোঁ কৰ্তৃপক্ষই শিক্ষাৰ্থী আৰু কৰ্মচাৰীসকল যাতে অপ্ৰীতিকৰ পৰিস্থিতিৰ সন্মুখীন নহয় তাৰ বাবে সকলো ধৰণৰ যত্ন ল’ব।” বিচাৰপীঠে কয়।

আৱেদনকাৰীসকলে যুক্তি দিছিল যে অফলাইন পৰীক্ষাই তেওঁলোকক ক’ভিদ-19 সংক্ৰমণৰ আশংকাত পেলাইছে।

তেওঁলোকে আৱেদনখনত কয়, “অফলাইন পৰীক্ষাৰ জৰিয়তে নিৰন্তৰ সংস্পৰ্শলৈ অহাৰ ফলত ক’ভিদ-19 ত সংক্ৰমণৰ আশংকা তীব্ৰভাৱে বৃদ্ধি হয়। এই প্ৰক্ৰিয়া স্বাস্থ্যৰ অধিকাৰ উলংঘন হিচাপে পৰিণত হয়।”