তামিলনাডুৰ শিক্ষা পুঁজিৰ দাবী: জৰুৰী শুনানি অস্বীকাৰ কৰিলে উচ্চতম ন্যায়ালয়ে
নতুন শিক্ষাবৰ্ষ আৰম্ভ হোৱাৰ পিছতো কেন্দ্ৰৰ পৰা শিক্ষা পুঁজি মুকলি কৰি নিদিয়া সন্দৰ্ভত তামিলনাডু চৰকাৰে দাখিল কৰা আবেদনৰ উচ্চতম ন্যায়ালয়ে ৯ জুনত জৰুৰী শুনানি ল’বলৈ অস্বীকাৰ কৰিছে। সমগ্ৰ শিক্ষা আঁচনিৰ অধীনত ২০২৪-২৫ বিত্তীয় বৰ্ষৰ বাবে কেন্দ্ৰীয় চৰকাৰে ২,১৫১ কোটি টকাৰ অধিক ধন ৰখা বুলি ৰাজ্য চৰকাৰে অভিযোগ উত্থাপন কৰিছিল।
ডিএমকে চৰকাৰৰ নেতৃত্বত থকা তামিলনাডুয়ে দাবী কৰিছিল যে শিক্ষাবৰ্ষটো ৩ জুনত আৰম্ভ হোৱাৰ পৰিপ্ৰেক্ষিতত এই পুঁজি প্ৰায় ৪৮ লাখ ছাত্ৰ-ছাত্ৰীৰ বাবে অতি জৰুৰী। তথাপি, ন্যায়মূৰ্তি প্ৰশান্ত কুমাৰ মিশ্ৰ আৰু মনমোহন সহায়ে গ্ৰীষ্মকালীন বন্ধৰ সময়ছোৱা উল্লেখ কৰি জৰুৰীতা নাথাকিল বুলি মত প্ৰকাশ কৰে আৰু এই বিষয়ত পূৰ্ণ শুনানি বন্ধৰ পিছতে অনুষ্ঠিত হ’ব বুলি জনায়।
তামিলনাডু চৰকাৰে অভিযোগ কৰে যে কেন্দ্ৰই পুঁজি মুক্তি নকৰাৰ ক্ষেত্ৰত ৰাজ্যখনৰ দ্বাৰা ৰাষ্ট্ৰীয় শিক্ষা নীতি (NEP 2020) আৰু প্ৰধানমন্ত্ৰী শ্ৰী স্কুল আঁচনি (PM SHRI) গ্ৰহণ নকৰাৰ সিদ্ধান্তক অজুহাত হিচাপে ব্যৱহাৰ কৰিছে। তামিলনাডুৱে এই প্ৰৱৃত্তিক অসাংবিধানিক বুলি অভিহিত কৰি কয় যে ই সমবায় ফেডাৰেলিজমৰ নীতিক লঙ্ঘন কৰে আৰু ৰাজ্যৰ শিক্ষাৰ ক্ষেত্ৰত অধিকাৰত হস্তক্ষেপ কৰে।
উল্লেখযোগ্য যে এই অভিযোগত তামিলনাডুৱে ২,২৯১ কোটি টকাৰ দাবী আগবঢ়াইছে আৰু উচ্চতম ন্যায়ালয়ৰ পৰা অনুৰোধ জনাইছে যে, চুক্তিবদ্ধ নোহোৱাকৈ এন ই পি ২০২০ আৰু পিএম শ্ৰী আঁচনিৰ ৰূপায়নত তামিলনাডুৰ ক্ষেত্ৰত বাধ্যতামূলক নহ’ব বুলি ঘোষণা কৰা হওক।
এই মর্মে মে’ মাহত সংবিধানৰ ১৩১ নং অনুচ্ছেদৰ অধীনত ৰাজ্য চৰকাৰে উচ্চতম ন্যায়ালয়ত গোচৰ কৰিছিল। মুখ্যমন্ত্ৰী এম কে ষ্টেলিনে প্ৰধানমন্ত্ৰীক পত্ৰ লিখি এই সন্দৰ্ভত আপত্তি জনাই পুঁজিৰ অব্যাহতি নোহোৱা ঘটনাটোক হেচা প্ৰদানৰ কৌশল বুলি অভিহিত কৰিছিল।
যদিও জৰুৰী শুনানি অস্বীকাৰ কৰা হৈছে, তথাপি মূল বিষয়ৰ ওপৰত পূৰ্ণ শুনানি পিছত অনুষ্ঠিত হ’ব বুলি সদৰী কৰে। তামিলনাডু চৰকাৰে উল্লেখ কৰে যে শিক্ষা পুঁজি অব্যাহত নোহোৱাত শিক্ষক দৰমহা, বিদ্যালয়ৰ পৰিকাঠামো আৰু শিক্ষাৰ মানত দীৰ্ঘম্যাদি প্ৰভাৱ পৰিছে।