উচ্ছেদিত ৰজনীখাল বনাঞ্চল পৰিদৰ্শন কৰি বন মন্ত্ৰী শুক্লবৈদ্যক সমালোচনা সুস্মিতা দেৱৰ

বনমন্ত্ৰী পৰিমল শুক্লবৈদ্যৰ গৃহ সমষ্টি ধলাইত ৮২টা পৰিয়ালক উচ্ছদ কৰা ঘটনাৰ আঁৰত ৰাজনৈতিক চক্ৰান্ত থকা বুলি অভিযোগ কৰিছে শিলচৰৰ প্ৰাক্তন কংগ্ৰেছ সাংসদ তথা সৰ্ব ভাৰতীয় মহিলা কংগ্ৰেছৰ সভানেত্ৰী সুস্মিতা দেৱে৷

উল্লেখ্য যে কাছাৰ জিলাৰ ধলাই সমষ্টিৰ অন্তৰ্গত ৰজনীখাল বনাঞ্চলত বসবাস কৰি অহা ৮২টা পৰিয়ালৰ লোকক যোৱা ৭ জুনত বন বিভাগে উচ্ছেদ কৰিছিল। আৰু মঙলবাৰে সন্ধিয়া উচ্ছেদস্থল পৰিদৰ্শন কৰি বন মন্ত্ৰী পৰিমল শুক্লবৈদ্যক তীব্ৰ সমালোচনা কৰে সুস্মিতা দেৱে৷

কংগ্ৰেছ নেত্ৰী গৰাকীয়ে বনমন্ত্ৰী পৰিমল শুক্লবৈদ্যৰ আক্ৰোশৰ বাবেই উচ্ছেদিত প্ৰায় পাঁচ শতাধিক লোকে বৰ্তমান মুকলি আকাশৰ তলত অনাহাৰে বসবাস কৰিব লগা হৈছে বুলি অভিযোগ কৰে।

বুধবাৰে নতুন দিল্লীৰ পৰা আহি পোনে পোনে উচ্ছেদস্থল পৰিদৰ্শন কৰা সুস্মিতা দেবে কয়, ‘ধলাই সমষ্টিৰ পৰা নিৰ্বাচিত হৈ মন্ত্ৰী হোৱা পৰিমল শুক্লবৈদ্যই বিষয়া সকলক বিপথে পৰিচালিত কৰি নিজৰ স্বাৰ্থত ব্যৱহাৰ কৰিছে। এন আৰ চিত এই উচ্ছেদিত লোকসকলৰ নাম আছে, তেওঁলোকৰ ভোটাৰ পৰিচয় পত্ৰ, ৰেশ্যন কাৰ্ড, জব কাৰ্ড আদি সকলো আছে তাৰ পিছতো কিয় এই সকল লোকক উচ্ছেদিত কৰা হ’ল’।

ইফালে উচ্ছেদিত লোকসকলে কংগ্ৰেছ নেত্ৰী সুস্মিতাক ওচৰত পাই কান্দোনত ভাঙি পৰে আৰু কয়, ‘বন বিষয়াসকলে ৮১টা পৰিয়ালৰ ঘৰ ভাঙি পেলাইছে কিন্তু তেওঁলোকে বিজেপি নেতা মাশ্ৰফ আলিৰ ঘৰত উচ্ছেদ কাৰ্য নচলালে। পঞ্চায়ত নিৰ্বাচনৰ সময়ত আমাক কোৱা হৈছিল যে যদিহে আমি বিজেপিক ভোট নিদিও তেন্তে তেওঁলোকে আমাৰ ইয়াত উচ্ছেদ অভিযান চলাব’।

ইফালে এই উচ্ছেদ অভিযান সম্পৰ্কত আজি কাছাৰ জিলা কংগ্ৰেছ সমিতিয়ে এখন গুৰুত্বপূৰ্ণ বৈঠকত মিলিত হ’ব আৰু উক্ত বৈঠকতে উচ্ছেদিত লোক সকলক ন্যায় প্ৰদানৰ উদ্দেশ্যে পৰৱৰ্তী কাৰ্যসূচী ঘোষণা কৰিব।