তামিলনাডু বিধানসভাৰ দ্বিতীয় ধনী বিধায়ক বিজয়; ১৩ গুণ বেছি সম্পত্তিৰে শীৰ্ষত বিৰোধী দলৰ নেতা

দেওবাৰে তামিলনাডুৰ মুখ্যমন্ত্ৰী হিচাপে শপত গ্ৰহণ কৰে অভিনেতা-ৰাজনীতিবিদলৈ পৰিণত হোৱা থালাপতি বিজয়ে। তেওঁৰ উত্থানে ৰাজ্যৰ ৰাজনীতিত নতুন দিগন্ত মুকলি কৰিছে, কিন্তু কেৱল জনপ্ৰিয়তাই নহয় – তেওঁৰ ধন-সম্পত্তিৰ বাবেও তেওঁৰ শিৰোনামত। একাধিক বাতৰি অনুসৰি তেওঁ তামিলনাডু বিধানসভাৰ দ্বিতীয়গৰাকী ধনী বিধায়ক। তেওঁৰ মুঠ সম্পত্তিৰ পৰিমান ৬৪৮ কোটি টকা।

বিজয়ে দাখিল কৰা শপতনামা অনুসৰি তেওঁৰ মুঠ সম্পত্তিৰ মূল্য ৪২৬.২০ কোটি টকা, আৰু তেওঁৰ অস্থাৱৰ সম্পত্তিৰ মূল্য ২২২.৬৫ কোটি টকা। যোৱা বিত্তীয় বৰ্ষত তেওঁ ১৮৪ কোটি টকা উপাৰ্জন কৰিছে – নতুন বিধায়কৰ ভিতৰত সৰ্বাধিক। অৰ্থাৎ জনপ্ৰিয়তা, ক্ষমতা আৰু উপাৰ্জনৰ সকলো দিশতে তেওঁ এতিয়া নিঃসন্দেহে চকু কপালত তুলিব পৰা ব্যক্তিত্ব।

এছ’চিয়েশ্যন ফৰ ডেম’ক্ৰেটিক ৰিফৰ্মছ (এডিআৰ) আৰু তামিলনাডু ইলেকচন ৱাচৰ বিশ্লেষণৰ পৰা এই তথ্য ওলাইছে। ২০২৬ চনৰ নিৰ্বাচনত জয়ী হোৱা ২৩৩ বিধায়কৰ শপতনামা পৰীক্ষা কৰি প্ৰস্তুত কৰা হৈছে এই প্ৰতিবেদন।

প্ৰতিবেদনত কোৱা হৈছে যে একমাত্ৰ লালগুডি সমষ্টিৰ পৰা বিজয়ী হোৱা এআইএডিএমকেৰ বিধায়ক লিমাৰোজ মাৰ্টিনহে বিজয়তকৈ আগবাঢ়ি আছে। তেওঁৰ মুঠ সম্পত্তি ৫,৮৬৩ কোটি টকা, যিটো এই বিধানসভাত সৰ্বাধিক আৰু প্ৰায় এক বিলিয়ন ডলাৰ।

২৩৩ গৰাকী বিধায়কৰ মুঠ সম্পত্তিৰ পৰিমাণ ১১,২৬৫ কোটি টকা। এজন বিধায়কৰ গড় সম্পত্তি এতিয়া ৪৮.৩৫ কোটি টকা, যিটো ২০২১ চনত আছিল মাত্ৰ ১২.২৭ কোটি টকা। অৰ্থাৎ যোৱা পাঁচ বছৰত বিধায়কৰ গড় সম্পদ চাৰিগুণ বৃদ্ধি পাইছে।

দলভিত্তিক গড় সম্পদ বিশ্লেষণত দেখা গৈছে যে-

• ১০৭ গৰাকী টিভিকে বিজয়ী প্ৰাৰ্থীৰ গড় সম্পদঃ ২৭.০৯ কোটি

• ৫৯ জন ডি এম কে বিজয়ী প্ৰাৰ্থীৰ গড় সম্পদঃ ১৪.৩৪ কোটি

• ৪৭ জন এআইএডিএমকে বিজয়ী প্ৰাৰ্থীৰ গড় সম্পদঃ ১৫২.৮৯ কোটি

• ৫ জন কংগ্ৰেছ বিজয়ী প্ৰাৰ্থীৰ গড় সম্পদঃ ১৭.৮১ কোটি

দেওবাৰে মুখ্যমন্ত্ৰী হিচাপে শপত গ্ৰহণ কৰাৰ সময়ত বিজয়ে কয়, “মোৰ বাহিৰে আন কোনো পালাৰ চেন্টাৰ নাথাকিব। মইয়েই একমাত্ৰ পাৱাৰ চেন্টাৰ হ’ম।”

ৰাজনৈতিক নাটকৰ অন্তত চাৰিদিনৰ ৰুদ্ধশ্বাস পৰিস্থিতি অতিক্ৰমি শপত গ্ৰহণ কৰা বিজয় এতিয়া চৰ্চাৰ কেন্দ্ৰবিন্দু – এফালে তেওঁৰ তাৰকাৰ খ্যাতি, আনফালে বিপুল ধন-সম্পত্তি – যি দুয়োটাই মিলি তামিলনাডুৰ ৰাজনীতিত তেওঁক লৈ এক নতুন সংজ্ঞা নিৰূপিত কৰিছে।