স্কুললৈ গৈ ‘ৰীলছ’ বনায় চৰকাৰী শিক্ষয়ত্ৰীয়ে; শিক্ষাৰ্থীয়ে কৰিব লাগে লাইক, কমেন্ট, শ্বেয়াৰ!

শিশুসকলে প্ৰতিদিনে বেগ, কিতাপ, বহী লৈ স্কুললৈ যায়। কিন্তু পঢ়া-শুনা কৰা নহয়। পঢ়াশুনা কৰাবনো কোনে? যিসকলে পঢ়ুৱাব লাগে তেওঁলোক যে আন কামত ব্যস্ত। শিক্ষয়ত্ৰীসকলে স্কুললৈ গৈ ইনষ্টাগ্ৰাম ৰীলছ বনায়। শিক্ষাৰ্থীসকলে বাধ্যতামূলকভাৱে সেই ভিডিঅ’ লাইক, কমেণ্ট আৰু শ্বেয়াৰ কৰিব লাগে।

অভিযোগ অনুসৰি ছাত্ৰ-ছাত্ৰীসকলক বাইদেউহঁতৰ চেনেলটো চাবস্ক্ৰাইব কৰিবলৈকো বাধ্য কৰা হয়।

উত্তৰ প্ৰদেশৰ আমৰোহা জিলাৰ এখন চৰকাৰী বিদ্যালয়ৰ শিক্ষয়ত্ৰীসকলৰ বিৰুদ্ধে উঠিছে এই অভিযোগ। বিদ্যালয়ত নিয়মীয়াকৈ ৰীলছ ভিডিঅ’ নিৰ্মাণ কৰা হয় বুলি ছাত্ৰ-ছাত্ৰীৰ অভিযোগ।

লগতে পঢ়কঃ ৰণক্ষেত্ৰত পৰিণত টক শ্ব’; লাইভ চলি থকাৰ মাজতে ইজনে সিজনক মাৰিলে চৰ, ঘোচা, গোৰ! ভাইৰেল ভিডিঅ’

কিছুমান শিক্ষয়ত্ৰীয়ে ভিডিঅ’টোত লাইভ থাকে, কোনোবাই ভিডিঅ’টো ৰেকৰ্ড কৰে। তেনে এটা ইনষ্টাগ্ৰাম একাউণ্টৰ নাম হৈছে ‘ৰৱি পূজা’।

সেইখন বিদ্যালয়ৰ ছাত্ৰ-ছাত্ৰীৰ অভিভাৱকে কয় যে তেওঁলোকে নিবিচাৰিলেও প্ৰতিদিনে শিক্ষকৰ ভিডিঅ’ লাইক কৰিব লাগিব। শ্বেয়াৰ আৰু চাবস্ক্ৰাইব কৰি তেওঁলোক ভাগৰি পৰিছে।

অৱশেষত অভিভাৱকসকলে একত্ৰিত হৈ সংশ্লিষ্ট জিলা দণ্ডাধীশৰ কাষ চাপে। তেওঁলোকে লগতে অভিযুক্ত শিক্ষয়ত্ৰীসকলৰ বিৰুদ্ধে কঠোৰ ব্যৱস্থা গ্ৰহণৰ দাবী উত্থাপন কৰে। ব্লক শিক্ষা বিষয়াগৰাকীয়ে এই সন্দৰ্ভত তদন্ত অব্যাহত থকা বুলি জানিবলৈ দিছে।

লগতে পঢ়কঃৱেগনাৰৰ দায়িত্ব লাভ কৰা কোন এই আন্দ্ৰেই ট্ৰ’শ্বেভ? পুনৰ ইউক্ৰেইনত চলিব নেকি বিধ্বংসী আক্ৰমণ?

সেই স্কুলৰে এজন ছাত্ৰৰ ভাষাত “বাইদেউহঁতে স্কুললৈ আহি ৰীলছ বনায়, আমাক দি সেইবোৰ লাইক কৰায়। নকৰিলে মাৰিব বুলিও ভাবুকি দিয়ে।”

আন এক ছাত্ৰই দাবী কৰা মতে শিক্ষয়ত্ৰীসকলে তেওঁলোকৰ দ্বাৰা আন কামো কৰায়। অভিযোগ অনুসৰি, বাচন ধোৱা, চাহ বনোৱাৰ দৰে কাম তেওঁলোকৰ দ্বাৰা কৰোৱা হয়।

লগতে পঢ়কঃ মহানগৰীত বিশ্বকাপ জ্বৰ! আজি গুৱাহাটীত ইংলেণ্ডৰ বিৰুদ্ধে প্ৰস্তুতি মেচত টীম ইণ্ডিয়া

অৱশ্যে এই অভিযোগ অস্বীকাৰ কৰে শিক্ষয়ত্ৰীসকলে। তেওঁলোকে দাবী কৰে যে তেওঁলোকে ছাত্ৰ-ছাত্ৰীক ভাল শিক্ষা প্ৰদানৰ বাবে প্ৰতিশ্ৰুতিবদ্ধ। এগৰাকী অভিযুক্ত শিক্ষয়ত্ৰীৰ ভাষাত, “আমি বিদ্যালয়ৰ সময়ত ছাত্ৰ-ছাত্ৰীক মন দি  পঢ়াও। কেতিয়াবা আমি ছাত্ৰ-ছাত্ৰীক শিকাবলৈ স্কুলত ভিডিঅ’ বনাওঁ।”