ভাৰতীয় ক্ৰিকেটাৰসকলে এদিনীয়া বিশ্বকাপত লীগ পৰ্যায়ৰ মেচ খেলিবলৈ দেশৰ বিভিন্ন প্ৰান্তলৈ যাত্ৰা কৰিব লগা হয়। কিন্তু তাৰ আগতেও যোৱা কেইটামান সপ্তাহত ৰোহিত শৰ্মা, বিৰাট কোহলীহঁতে দেশৰ বিভিন্ন চহৰ আৰু বিদেশ ভ্ৰমণ কৰিবলগীয়া হৈছিল। বাংগালুৰুৰ নেশ্যনেল ক্ৰিকেট একাডেমীত অনুষ্ঠিত প্ৰস্তুতি শিবিৰৰ অন্তত ভাৰতীয় দলটোৱে কলম্বোৰ পৰা পল্লেকেলে, কলম্বো, মোহালী, ইন্দোৰ, ৰাজকোট আৰু এতিয়া গুৱাহাটীত উপস্থিত হৈছে।
ভাৰতে আজি ইংলেণ্ডৰ বিৰুদ্ধে প্ৰথমখন এদিনীয়া বিশ্বকাপৰ প্ৰস্তুতি মেচ গুৱাহাটীৰ বৰ্ষাপাৰা ষ্টেডিয়ামত খেলিব। অভিজ্ঞ অফস্পিনাৰ ৰবিচন্দ্ৰন অশ্বিনক এই মেচত দেখা যাব। অষ্ট্ৰেলিয়াৰ বিৰুদ্ধে এদিনীয়া শৃংখলাত খেলি বিশ্বকাপ দলত স্থান লাভ কৰে অশ্বিনে। ১৮ মাহৰ পাছত এদিনীয়া ফৰ্মেটত খেলাৰ সুযোগ পোৱাৰ পাছত এইগৰাকী অলৰাউণ্ডাৰগৰাকীয়ে ভাল প্ৰদৰ্শন দেখুৱাইছে।
এইবাৰ বিশ্বকাপত ভাল প্ৰদৰ্শন দেখুওৱাৰ আশা কৰিছে অশ্বিনে। অক্ষৰ পেটেল আঘাত নোপোৱা হ’লে অশ্বিনে এই বিশ্বকাপত খেলাৰ কথা নাছিল। তেওঁক বিশ্বকাপৰ দলত অন্তৰ্ভুক্ত কৰা হোৱা নাছিল। কিন্তু অশ্বিনে অন্তিম মুহূৰ্তত সুযোগ পোৱাৰ পিছত নিৰ্বাচক আৰু দল পৰিচালনাৰ আস্থা অৰ্জন কৰিব বিচাৰে।
আজি অনুষ্ঠিত হ’বলগীয়া ৱাৰ্ম আপ মেচখনত অশ্বিনৰ উপৰিও ক্ৰিকেটপ্ৰেমীসকলৰ দৃষ্টি থাকিব শ্ৰেয়াছ আয়াৰ, কে এল ৰাহুল, যশপ্ৰীত বুমৰাহৰ ওপৰত। অষ্ট্ৰেলিয়াৰ বিৰুদ্ধে এদিনীয়া শৃংখলাত শ্ৰেয়াছে ভাল প্ৰদৰ্শন দেখুৱাইছিল। তেওঁ আঘাতৰ পৰা সুস্থ হৈ উঠিছে আৰু ফিট হৈ আছে। ৰাহুল, বুমৰাহৰো ভাল ফৰ্মত আছে। ফলত বিশ্বকাপৰ পূৰ্বে ভাৰতৰ দল পৰিচালনাৰ উদ্বেগ কমিছে।
দীঘলীয়া বিমান যাত্ৰা আৰু একেৰাহে খেলৰ হেঁচা পৰিলক্ষিত হোৱাৰ বাবে শুকুৰবাৰে বাধ্যতামূলক অনুশীলন অনুষ্ঠিত নহ’ল ভাৰতীয় দলটোৱে। অনুশীলনত আছিল কেৱল অশ্বিন, শুভমন গীল, ঈশান কিষাণ আৰু শাৰ্দুল ঠাকুৰ। বাকী দলটোৱে জিৰণি ল’লে। অৱশ্যে শনিবাৰ যিহেতু ৱাৰ্ম আপ মেচ, গতিকে সকলোকে সালসলনি কৰি সুযোগ দিয়াৰ সম্ভাৱনা আছে। ভাৰতৰ দল পৰিচালনাৰ লক্ষ্য দলৰ সকলোকে ৱাৰ্ম আপ মেচ দুখনত পৰ্যবেক্ষণ কৰাৰ।
ইংলেণ্ডৰ ক্ৰিকেটাৰসকলে লণ্ডনৰ পৰা গুৱাহাটীত উপস্থিত হবলৈ ৩৮ ঘন্টা বিমান যাত্ৰা কৰিব লগা হৈছে। ডুবাই আৰু মুম্বাইত বহু সময় অপেক্ষা কৰিব লগাও হৈছে। ফলত জনী বেয়াৰষ্টো ভাগৰি পৰিছে। কিন্তু ইয়াৰ মাজতে প্ৰস্তুতিৰ মেচ খেলিব লাগিব। কিন্তু এটাই সকাহ, ২ অক্টোবৰত নেদাৰলেণ্ডৰ বিৰুদ্ধে দ্বিতীয়খন ৱাৰ্ম আপ মেচো হব গুৱাহাটীত। ফলত ইংলেণ্ডৰ ক্ৰিকেটাৰসকলে আৰু কেইদিনমান বিমান যাত্ৰা কৰিব নালাগে।
ICC টুৰ্ণামেণ্টত ভাৰতৰ বিৰুদ্ধে যোৱা ২ খন মেচতে ইংলেণ্ডে জয়লাভ কৰিছে। ২০১৯ চনত ইংলেণ্ডে নিজৰ দেশত অনুষ্ঠিত এদিনীয়া বিশ্বকাপত লীগ পৰ্যায়ত ভাৰতক পৰাস্ত কৰিছিল। তাৰ পিছত ২০২২ চনৰ টী-২০ বিশ্বকাপৰ ছেমি ফাইনেলত এলেক্স হেলছ, জোছ বাটলাৰৰ দলটোৱে ভাৰতক ১০ উইকেটত পৰাস্ত কৰে। এইবাৰ আকৌ ভাৰতৰ বিৰুদ্ধে জয়ী হোৱাটোৱে তেওঁলোকৰ লক্ষ্য।
