জুবিন গাৰ্গৰ নামত উদ্ভণ্ডালি কৰা জাতীয় সংগঠনৰ উদণ্ড নেতাৰ বিৰুদ্ধে ব্যৱস্থা নোলোৱাত ক্ষোভ কেমিষ্টছ এণ্ড ড্ৰাগিষ্ট এছ’চিয়েছনৰ

যোৱা ১৯ ছেপ্তেম্বৰ তাৰিখে প্ৰাগজ্যোতিষ সাংস্কৃতিক প্ৰকল্পত আৰম্ভ হৈছিল কেমিষ্টছ এণ্ড ড্ৰাগছ এছ’চিয়েছনৰ বাৰ্ষিক সভা। উক্ত দিনা সভাখন সুকলমে অনুষ্ঠিত হোৱাৰ পিছত ২০ ছেপ্তেম্বৰ তাৰিখে একে স্থানতে অনুষ্ঠিত কৰা হৈছিল সভাৰ দ্বিতীয় দিনৰ কাৰ্যসূচী।

কিন্তু দ্বিতীয় দিনৰ কাৰ্যসূচী চলি থকাৰ সময়তে কেইবাটাও দল-সংগঠনৰ নেতা-কৰ্মীয়ে সভাকক্ষত প্ৰৱেশ কৰি বেনাৰ ফালি সভা অনুষ্ঠিত কৰাত বাধা প্ৰদান কৰে। লগতে, এছ’চিয়েছনে তাত মাছ-মাংসৰে ভোজভাত খোৱা বুলিও অভিযোগ উত্থাপন কৰে।

উল্লেখ্য যে ১৯ ছেপ্তেম্বৰত মৃত্যু হৈছিল হাৰ্টথ্ৰৱ জুবিন গাৰ্গৰ। ৰাজ্যজুৰি বিৰাজ কৰিছিল গভীৰ শোকাকুল পৰিৱেশে, ফলত এক অঘোষিত বন্ধই বিৰাজ কৰিছিল সমগ্ৰ অসমত। সকলো কাৰ্যালয়, শিক্ষানুষ্ঠান, দোকান-পোহাৰ নিজে নিজেই বন্ধ হৈ পৰিছিল। জাতীয় সংগঠন সমূহেও সকলোকে শোক পালন কৰি দোকান-পোহাৰ, কাৰ্যালয়, সভা-সমিতি স্থগিত ৰাখিবলৈ আহ্বান জনাইছিল।

আনহাতে, ২০ ছেপ্তেম্বৰত পুৱা জুবিন গাৰ্গক শ্ৰদ্ধাঞ্জলি জনাই বাৰ্ষিক সভাৰ দ্বিতীয় দিনাৰ কাৰ্যসূচী আৰম্ভ কৰিছিল। কিয়নো সকলো যাতায়ত আৰু দোকান-পোহাৰ বন্ধ হোৱাৰ পিছত জৰুৰীকালীন ঔষধ কেনেকৈ যোগান ধৰা হ’ব সেয়া আলোচনা কৰিব লগা হৈছিল এছ’চিয়েছনৰ বিষয়া-কৰ্মী সকলে। সেই আলোচনা  চলি থকাৰ মাজতেই দল-সংগঠনৰ নেতাই জুবিন গাৰ্গৰ নাম লৈ সভাত উপস্থিত থকা লোকসকলক অপদস্থ কৰাৰ লগতে সভা অনুষ্ঠিত কৰাত বাধা প্ৰদান কৰে।

এই ঘটনা সম্পৰ্কে এতিয়া মুখ খুলিছে কেমিষ্টছ এণ্ড ড্ৰাগিষ্ট এছ’চিয়েছনৰ বিষয়া দিলীপ গোস্বামীয়ে। তেওঁ নৰ্থ-ইষ্ট নাওৰ লগত হোৱা এক কথা-বাৰ্তাত কয় যে কেমিষ্টছ এণ্ড ড্ৰাগিষ্ট এছ’চিয়েছনৰ কিছু অসাধু তথা সুবিধালোভী বিষয়াই কেমিষ্টছ এণ্ড ড্ৰাগিষ্ট এছ’চিয়েছনক হেয় প্ৰতিপন্ন কৰি নিজৰ সুবিধা আদায়ৰবাবে ষড়যন্ত্ৰমূলকভাবে এনে কামত জড়িত হৈ পৰিছে।

গোস্বামীয়ে লগতে সভাত বাধা দিয়া কাৰ্যত জড়িত থকা ২ গৰাকী জাতীয় সংগঠনৰ নেতাৰ নাম উল্লেখ কৰে। তেওঁলোক হৈছে জাতীয় যুৱ-ছাত্ৰ পৰিষদৰ নেতা প্ৰাগজ্যোতিষ বনিয়া, বীৰ লাচিত সেনা অসমৰ বিকাশ অসম।

লগতে তেওঁ কয় যে উক্ত সভাত কোনোধৰণৰ মাছ-মাংসৰ ভোজভাত হোৱা নাছিল। তেওঁলোকে মিছাই মাছ-মাংসৰে ভাত খোৱা বুলি উদ্ভণ্ডালি কৰিছিল। আমাৰো জুবিন গাৰ্গৰ প্ৰতি শ্ৰদ্ধা আছে। কিন্তু তেওঁলোকে নিজকে বেছি জুবিনপ্ৰেমী দেখুৱাই এনে উদ্ভণ্ডালি কৰাতো উচিত হোৱা নাই। গতিকে আৰক্ষী-প্ৰশাসনে এই সকল লোকৰ বিৰুদ্ধে উচিত ব্যৱস্থা গ্ৰহণ কৰিব লাগে।