“মুখ্যমন্ত্ৰীয়ে গৃহমন্ত্ৰীৰ পদ ত্যাগ কৰিব লাগে”: কাৰ্বি আংলঙৰ অশান্তিক লৈ সৰৱ অখিল গগৈ
কাৰ্বি আংলং জিলাত শেহতীয়াকৈ সৃষ্টি হোৱা হিংসাত্মক পৰিস্থিতি আৰু অশান্তিক লৈ মঙলবাৰে তীব্ৰ প্ৰতিক্ৰিয়া প্ৰকাশ কৰে ৰাইজৰ দলৰ সভাপতি তথা বিধায়ক অখিল গগৈয়ে। এই পৰিস্থিতিৰ বাবে তেওঁ ৰাজ্যৰ বিজেপি চৰকাৰ, গৃহ বিভাগ আৰু অসম আৰক্ষীক পোনপটীয়াকৈ জগৰীয়া কৰে।
এক সংবাদমেল সম্বোধন কৰি গগৈয়ে কাৰ্বি আংলঙৰ ৰাইজক শান্তি বজাই ৰাখিবলৈ আৰু আইন হাতত তুলি নলবলৈ আহ্বান জনায়। একে সময়তে তেওঁ প্ৰশাসনৰ ভূমিকাক কঠোৰ ভাষাৰে সমালোচনা কৰে। তেওঁ কয় যে কাৰ্বি আংলঙৰ ঘটনাই অসম আৰক্ষী আৰু গৃহ বিভাগৰ চৰম ব্যৰ্থতা উদঙাই দিছে।
গগৈয়ে কয় যে সোমবাৰে মাজনিশা তেওঁ অসমৰ মুখ্যমন্ত্ৰী, মুখ্য সচিব আৰু আৰক্ষী সঞ্চালক প্ৰধান হৰমিট সিঙক এখন স্মাৰকপত্ৰ প্ৰদান কৰিছিল। তাত তেওঁ সকীয়াই দিছিল যে কাৰ্বি আংলঙৰ পৰিস্থিতি অতি সোনকালে অধিক ভয়াৱহ হৈ পৰাৰ সম্ভাৱনা আছে। কিন্তু আগতীয়া তথ্য থকাৰ পিছতো প্ৰশাসনে কোনো প্ৰতিৰোধমূলক ব্যৱস্থা গ্ৰহণ নকৰিলে।
তেওঁ অভিযোগ কৰে যে কাৰ্বি ভূমিত অসম আৰক্ষীৰ কোনো নিয়ন্ত্ৰণ নাই। গৃহ বিভাগে পৰিস্থিতিৰ গুৰুত্ব বুজাত ব্যৰ্থ হৈছে।
গগৈৰ মতে, বিগত ১২-১৪ দিন ধৰি প্ৰতিবাদকাৰীসকলে শান্তিপূৰ্ণ আৰু গণতান্ত্ৰিকভাৱে প্ৰতিবাদ কৰি আছিল। কিন্তু মুখ্য কাৰ্যবাহী সদস্য তুলিৰাম ৰংহাঙে তেওঁলোকৰ সৈতে কোনো আলোচনা নকৰিলে। বৰঞ্চ মাজনিশা আৰক্ষীয়ে প্ৰতিবাদকাৰীক আটক কৰাৰ ফলতহে পৰিস্থিতি অধিক উত্তপ্ত হৈ পৰে।
গগৈয়ে কয়, “আৰক্ষী দুটা দিশত ব্যৰ্থ হ’ল— এফালে নিৰীহ প্ৰতিবাদকাৰীক দমন কৰিলে আৰু আনফালে এজন চৰকাৰী নেতাক সুৰক্ষা দিব নোৱাৰিলে।”
মুখ্যমন্ত্ৰীয়ে সততে কৈ থকা খিলঞ্জীয়া সুৰক্ষাৰ প্ৰসংগ উত্থাপন কৰি গগৈয়ে প্ৰশ্ন কৰে যে চৰকাৰে কিয় প্ৰতিবাদকাৰীৰ সৈতে মেজত বহি আলোচনা কৰিব নোৱাৰিলে? তেওঁ অশান্তিৰ সময়ত সম্পত্তি হেৰুওৱা লোকসকলৰ বাবে ক্ষতিপূৰণো দাবী কৰে।
বিজেপি চৰকাৰৰ দিনত পুনৰ বিটিচি এলেকাৰ দৰে সংঘাতৰ সৃষ্টি হোৱাটো দুৰ্ভাগ্যজনক বুলি অভিহিত কৰি অখিল গগৈয়ে দাবী জনায় যে— মুখ্যমন্ত্ৰী হিমন্ত বিশ্ব শৰ্মাই গৃহমন্ত্ৰীৰ পদৰ পৰা পদত্যাগ কৰিব লাগে।